ءۇندىستاندا كوروناۆيرۋستان ءولىم-ءجىتىم كورسەتكىشى رەكورد ورناتۋدا
بۇل، پاندەميا باستالعالى ەڭ جوعارى كورسەتكىش، دەپ حابارلايدى قازاقپارات ۆ ۆ س اگەنتتىگىنە سىلتەمە جاساپ.
ءبىر كۇن بۇرىن ءۇندىستاندا كوروناۆيرۋس ىندەتىن جۇقتىرۋدىڭ جاڭادان 400 مىڭنان استام جاعدايى انىقتالدى. ءبىر تاۋلىكتىك مۇنداي كورسەتكىش وزگە ەشبىر ەلدە تىركەلگەن جوق. سىرقات تانۋدىڭ كۇرت ارتۋىنا ەلدىڭ دەنساۋلىق ساقتاۋ جۇيەسى دايىن بولماي شىقتى. اۋرۋحانالار ستاتسيونارلىق ەمدى قاجەت ەتەتىن بارلىق ناۋقاستى قابىلداي الماي جاتىر. سونداي- اق ەلدە مەديتسينالىق وتتەگى تاپشىلىعى بار.
ءۇندىستاندا قازىر نە بولىپ جاتىر؟
پاندەميا باستالعالى ءۇندىستاندا كوروناۆيرۋستىڭ 19 ميلليوننان استام وقيعاسى تىركەلدى. بۇل كورسەتكىشپەن ا ق ش- تان كەيىن الەمدە ەكىنشى ورىندا تۇر. ىندەتتەن 215 مىڭ ادام قايتىس بولعانى زەرتحانالىق راستالدى. دەگەنمەن، ساراپشىلاردىڭ پايىمىنشا، تەستىلەردىڭ جەتىسپەۋشىلىگىنەن شىنايى كورسەتكىش رەسمي مالىمەتتەردەن الشاق جانە جوعارى بولۋى ىقتيمال. ساراپشىلاردىڭ ايتۋىنشا، كوپتەگەن ادامنىڭ، اسىرەسە اۋىل تۇرعىندارىنىڭ مەديتسينالىق كومەككە جۇگىنۋگە مۇمكىندىگى جوق جانە ولار ۇيلەرىندە ەمدەلۋدە. سونداي- اق مامانداردىڭ سوزىنە قاراعاندا، اۋىلدار مەن شاعىن قالالاردا كوروناۆيرۋستان بولىپ جاتقان ءولىم- ءجىتىم رەسمي دەرەكتەرگە ەنبەي قالىپ جاتىر.
ءۇندىستاندا ۆاكسيناتسيا قارقىنى قانداي؟
تەوريا جۇزىندە ءۇندىستاننىڭ ءاربىر ەرەسەك تۇرعىنى ۆاكسيناتسيادان وتە الادى. الايدا، وتكەن سەنبى كۇنى باستاۋ العان ەگۋ كامپانياسىنا باستالماي جاتىپ توقتاۋ قاۋپى تۋىندادى: بىرنەشە شتات 18-44 جاس ارالىعىنداعى حالىقتى ەگۋ ءۇشىن ۆاكسينانىڭ قاجەتتى دوزاسى جەتكىلىكسىز ەكەندىگىن مالىمدەدى. ءۇندىستان تەرريتورياسىندا كوروناۆيرۋسقا قارسى ويلاپ تابىلعان بارلىق ۆاكسينانىڭ كوپ بولىگى ءوندىرىلىپ جاتقانىنا قاراماستان، ەلدە ەگۋ كامپانياسىن شۇعىل ۇيىمداستىرۋعا دوزالاردىڭ قاجەتتى كولەمى جوق. وسىعان وراي ءۇندىستان AstraZeneca ۆاكسيناسىن ەكسپورتتاۋدى ۋاقىتشا توقتاتتى. ەلدىڭ دەنساۋلىق ساقتاۋ مينيسترلىگىنىڭ مالىمەتىنشە، 2-مامىرعا دەيىن ۆاكسينانىڭ 1-كومپونەنتىن نەبارى 84599 ادام العان. ءۇندىستان ەكى ۆاكسينانى قولدانۋدا - وكسفوردتىڭ AstraZeneca (ءۇندىستان ونى Covishield دەپ اتايدى) جانە ءۇندىستاننىڭ Bharat Biotech كومپانياسى وندىرگەن - Covaxin. رەسەيدىڭ Sputnik V ۆاكسيناسى دا ماقۇلداۋ الدى. Sputnik V پرەپاراتىنىڭ العاشقى 150 مىڭ دوزاسى وتكەن سەنبىدە ەلگە جەتكىزىلدى.
ءۇندىستانعا كومەكتەسۋ ءۇشىن وزگە ەلدەردىڭ ارەكەتى قانداي؟
كوپتەگەن ەلدەر ءۇندىستانعا كومەگىن جولدادى جانە ءالى دە جىبەرىپ جاتىر. 29-ساۋىردەگى مالىمەتكەن سايكەس، ءدارى- دارمەك پەن مەديتسينالىق تەحنيكا جىبەرگەن ەلدەر سانى 40-قا جۋىق بولدى. ا ق ش- تان بىرنەشە ۇشاق كەلدى. ولار مەديتسينالىق وتتەگى، گيگيەنالىق ماسكالار جانە كوروناۆيرۋسقا ەكسپرەسس- تەستەر جونەلتكەن. سەنبى كۇنى گەرمانيانىڭ اسكەري- كولىكتىك ۇشاعى ءۇندىستانعا وكپەنى جاساندى جەلدەتۋگە ارنالعان 120 اپپارات الىپ كەلدى. ۇلى بريتانيا دا ءتۇرلى مەديتسينالىق قۇرالدار جىبەرگەن.
ءۇندىستان نەلىكتەن لوكداۋن ەنگىزبەيدى؟
ءۇندىستان بيلىگى ەلدىڭ ءبۇتىن اۋماعىندا قاتاڭ لوكداۋن ەنگىزۋدى سوڭعى شارا رەتىندە قاراستىرىپ وتىر. ەل ۇكىمەتى ەكونوميكالىق احۋال ودان ءارى ۋشىعىپ كەتەتىنىنە قاۋىپتەنەدى. وتكەن جىلى ءساۋىر- ماۋسىم ارالىعىندا كارانتيندىك شەكتەۋلەردىڭ ەنگىزىلۋىنەن ەلدىڭ جالپى ىشكى ءونىمى 2019 -جىلدىڭ وسىنداي كەزەڭىمەن سالىستىرعاندا %24 تومەندەپ كەتكەن. دەگەنمەن، ەلدىڭ جەكەلەگەن وڭىرىندە قاتاڭ كارانتيندىك شارالار ەنگىزىلگەن. ماسەلەن، دەليدە، ماحاراشترا، كارناتاكا، باتىس بەنگاليا جانە وديشا شتاتتارىندا. ءبىرقاتار وڭىردە، سونىڭ ىشىندە حالىق كوپ قونىستانعان ۋتتار- پرادەش شتاتىندا كونمەندانتتىق ساعات جانە دەمالىس كۇندەرى لوكداۋن بار. Indian Express گازەتىنىڭ جازۋىنشا، كوروناۆيرۋس پاندەمياسىمەن كۇرەس جونىندەگى جۇمىس توبى ىندەتتى اۋىزدىقتاۋ ءۇشىن جالپىۇلتتىق لوكداۋن ەنگىزۋدى ۇسىنىپ وتىر.
اۆتور: ميرا تولەندى قىزى
