بوريس ۋگاي: قازاق ءتىلىن ۇيرەنۋ - ءارقايسىمىزدىڭ مىندەتىمىز
بوريستىڭ اناسى - ەلەنا ۋگاي ەلەنا شيرەك عاسىر بويى ىشكى ىستەر ورگاندارىندا قىزمەت ىستەگەن. قازىر ق ر ىشكى ىستەر مينيسترلىگىنە ەڭبەك سىڭىرگەن زەينەتكەر، زاپاستاعى پولكوۆنيك. اناسى ۇلىنا بالا كەزىنەن وتە جاقسى ءتالىم-تاربيە بەردى. ءوزى دە قازاق ءتىلىن جەتىك مەڭگەردى. ءوزىنىڭ وسىنداي قاسيەتىنىڭ ارقاسىندا وزگە ارىپتەستەرىنە ۇلگى بولا ءبىلدى.
اناسىنىڭ ءىزباسارى اتانعان بوريس قىزىلوردا قالاسىندا 1986 -جىلى دۇنيەگە كەلگەن. قالاداعى № 198-ورىس مەكتەبىندە ءبىلىم السا دا وقۋ ورداسىندا جۇرگەن كەزدەن-اق قازاق ءتىلىن ەركىن مەڭگەردى. ءوز قاتارلاستارىنان وزىق بولدى. قازاق ءتىلى پانىندە ول ۇنەمى بەلسەندى كورىنىپ، ۇستازدار نازارىنا ىلىكتى. مەكتەپتى بىتىرگەننەن كەيىن قىزىلوردا قالاسىنداعا قازاق گۋمانيتارلىق زاڭ ۋنيۆەرسيتەتى فيليالىندا ءبىلىم الدى. قازىر بوريس قىزىلوردا قالالىق پوليتسيا باسقارماسىنىڭ جەدەل باسقارۋ ورتالىعىنىڭ بەينەباقىلاۋ ينسپەكتورى قىزمەتىن اتقارادى. قازاق ءتىلى وقىتۋ كۋرستارىنا قاتىسىپ، ءبىلىمىن جەتىلدىرىپ وتىرادى.
«مەن قىزىلوردا قالاسىندا تۋىپ- ءوستىم. ورىسشا ءبىلىم بەرەتىن مەكتەپتە وقىدىم. قازاق ءتىلى پانىنەن تەك بەس دەگەن باعا الاتىن ەدىم. تىلگە دەگەن قىزىعۋشىلىعىم سول كەزدەن باستالدى. ورىس مەكتەپتەرىنىڭ اراسىندا قازاق ءتىلى ءپانى بويىنشا وتكەن قالالىق وليمپيادادا جۇلدەلى ورىن يەلەندىم. بۇل ماعان جاڭا تانىستار مەن دوستار تابۋىما سەبەپشى بولدى. جەرگىلىكتى ۇلت وكىلدەرى بالالارىمەن بىرگە ويناپ ءوستىم. ەلىمىزدەگى بارشا ۇلت وكىلدەرى قازاق ءتىلىن ەركىن مەڭگەرىپ كەتەدى دەپ ويلايمىن. بۇل - ءاربىرىمىزدىڭ مىندەتىمىز»، - دەيدى وفيتسەر.
قىزىلوردا وبلىسىنىڭ پوليتسيا دەپارتامەنتىندە 11 وزگە ۇلت قىزمەت ەتەدى. ولاردىڭ بارلىعى تاتۋلىق پەن دوستىق دانەكەرى رەتىندە ونەگە كورسەتىپ كەلەدى. پوليتسيا كاپيتانى بوريس ۋگاي بارشا قازاقستاندىقتاردى بىرلىك مەرەكەسىمەن قۇتتىقتايدى.
«قازاقستان حالقىن دوستاستىق، ىنتىماق پەن بىرلىك كۇنىمەن قۇتتىقتايمىن. بىرلىگىمىز ارتىپ، تاتۋلىق تۋى جەلبىرەي بەرسىن» ، - دەيدى ول.
اۆتور: ءادىلجان ۇمبەت
