بەلگيادا پاندەميانىڭ ءۇشىنشى تولقىنى: پاتسيەنتتەر اراسىندا جاستار كوپ
ەلدىڭ جەتەكشى ۆيرۋسولوگ دارىگەرى يۆ ۆان لەتەمنىڭ ايتۋىنشا، ۆاكسينالاۋ ناۋقانى قارقىندى جۇرگىزىلگەندىكتەن اۋرۋحانالارعا تۇسكەن ناۋقاستاردىڭ جاسى ايتارلىقتاي تومەندەپ كەلەدى. بەلگيادا كوروناۆيرۋستىڭ «ءۇشىنشى تولقىنى» باستالعالى (اقپاننىڭ ورتاسىنان باستاپ)، ك ۆ ي جۇقتىرعان پاتسيەنتتەردىڭ جارتىسى - 66 جاسقا دەيىنگىلەر. «بۇل ەكىنشى تولقىن كەزەڭىنە قاراعاندا جەتى جاس كىشى، سوندىقتان وتە ماڭىزدى»، - دەيدى ي. لەتەم.
ول اتالعان ءۇردىستى ەگدە جاستاعى ادامدار اراسىندا ۆاكسينالاۋ جۇرگىزىلگەنىمەن بايلانىستىرىپ وتىر. قازىرگى كەزدە بەلگيا اۋرۋحانالارىندا كوروناۆيرۋس دياگنوزىمەن جاتقانداردىڭ 31 پايىزى - 45-50 جاس ارالىعىنداعى ادامدار. اۋرۋحانالارعا ءتۇسىپ جاتقان پاتسيەنتتەردىڭ 2 پايىزى عانا قارتتار ءۇيى نەمەسە مامانداندىرىلعان پانسيوناتتاردان جەتكىزىلگەن. پاندەميانىڭ «ەكىنشى تولقىنىندا» بۇل كورسەتكىش 20 پايىز بولدى. بۇدان باسقا، قازىرگى كەزدە كوروناۆيرۋسقا شالدىققان پاتسيەنتتەردە اۋرۋدىڭ نەگىزگى پاتولوگياسى از.
«ەكىنشى تولقىن» كەزىندە پاتسيەنتتەردىڭ 50-60 پايىزىندا كەم دەگەندە ەكى سوزىلمالى اۋرۋى بولعان. «ءۇشىنشى تولقىندا» بۇل كورسەتكىش پاتولوگياسى بار ناۋقاستاردىڭ 30-50 پايىزىندا عانا. بۇل رەتتە مۇنداعى ىلەسپە فاكتور - سەمىزدىك. بەلگيالىق ۆيرۋسولوگ ماماننىڭ پىكىرىنشە، ەلدە كۆي ناۋقاستارىنىڭ قايتىس بولۋىنىڭ ازايۋى اۋرۋدى جاقسى ەمدەۋدىڭ ارقاسىندا بولىپ وتىر. بۇدان باسقا، بۇل كورسەتكىش اۋرۋحانالارعا كەلىپ تۇسەتىن پاتسيەنتتەردىڭ جاسىنىڭ تومەندەۋىنە دە بايلانىستى.
«بەلگياداعى ءاربىر ونىنشى پاتسيەنت COVID-19 ۆيرۋسىمەن كۇرەستە ءالى دە جەڭىلىپ جاتىر. بۇل جاعداي 2020 -جىلدىڭ باسىمەن سالىستىرعاندا جاقساردى، سەبەبى ول كەزدە ون پاتسيەنتتىڭ ىشىندە ەكەۋى كوز جۇماتىن. الايدا ءولىم-ءجىتىم دەڭگەيى ءالى دە جوعارى»، - دەدى ي. لەتەم.
بەلگيانىڭ قارقىندى تەراپيا بولىمدەرىندە ءالى دە پاتسيەنتتەردىڭ ۇشتەن ءبىر بولىگى كوروناۆيرۋستان كوز جۇمىپ جاتىر. بەلگيادا ەل تۇرعىندارىنىڭ 30 پايىزىنا ۆاكسينا سالىپ ۇلگەردى. وسىعان بايلانىستى ەل ۇكىمەتى كارانتين شەكتەۋلەرىن بىرتىندەپ الىپ تاستاۋعا كىرىستى.
اۆتور: زارينا تۋعانبايەۆا
