مادەنيەت ءمينيسترى ەسكەندىر حاسانعاليەۆتىڭ وتباسىنا كوڭىل ايتتى

«قازاق ونەرى اۋىر قازاعا ۇشىرادى. تاعى ءبىر دارحان جۇرەكتى حالقىمىزدىڭ دارا پەرزەنتىنىڭ جۇرەگى توقتادى. بار بولمىسى ەلىم دەپ جىرلايتىن ەسكەندىر اعامىز كوش-كەرۋەنگە ىلەسىپ، كەلمەستىڭ كەمەسىنە ءمىنىپ ارامىزدان كەتە باردى دەگەن سۋىت حاباردى ەستىپ، قابىرعام قايىسىپ وتىر. ق ر مادەنيەت جانە سپورت مينيسترلىگىنىڭ اتىنان تانىمال ءانشى، كومپوزيتور، پروفەسسور، مەملەكەتتىك سىيلىقتىڭ لاۋرەاتى، «قۇرمەت»، «وتان» وردەنىنىڭ، «پلاتينالى تارلان» سىيلىعىنىڭ يەگەرى ەسكەندىر وتەگەن ۇلى حاسانعاليەۆتىڭ قايتىس بولۋىنا بايلانىستى حاسانعاليەۆتەر اۋلەتىنىڭ قايعىسىنا ورتاقتاسىپ، كوڭىل ايتامىن»، - دەپ جازدى ا. رايىمقۇلوۆا Facebook پاراقشاسىندا.

مينيستر ە. حاسانعاليەۆتىڭ عيبراتتى عۇمىرىن ءان مەن ساز الەمىنە ارناپ، قازىرگى قازاق ەستراداسىنىڭ نەگىزىن قالاعان ونەر يەسى، وتباسى مەن ورتاسىنا قورعان بولعان ابزال ازامات بولعانىن جازدى.

«اعامىزدىڭ «اتامەكەن»، «ادەمى»، «اسىل ارمان»، «ءومىرىمنىڭ جازى»، «ەسكىرمەگەن ماحاببات» وزگە دە اندەرىن بىلمەيتىن قازاق جوق. شەت مەملەكەتتەردە دە تىڭدارماننىڭ ىستىق ىقىلاسىنا بولەنگەن تۋىندىلارى ءبىزدىڭ ارامىزدا ماڭگى ءومىر سۇرەدى. مانەرلى مۋزىكاسىمەن وزىندىك قولتاڭباسىن قالىپتاستىرعان ەسكەندىر حاسانعاليەۆتىڭ شىعارماشىلىعى قازاق مادەنيەتىنىڭ قۇندى قازىناسى. ونەر مايتالمانىنىڭ اسىل بەينەسى قالىڭ قازاقتىڭ كوڭىل ءتورى مەن جۇرەك تۇكپىرىندە ماڭگى ساقتالادى. مارقۇمنىڭ كوزى تىرىسىندە جاساعان يگى-جاقسى امالدارى الدىنان جارىلقاسىن. جاتقان جەرى جايلى، توپىراعى تورقا بولسىن»، - دەدى مادەنيەت جانە سپورت ءمينيسترى.

ەسكەندىر وتەگەن ۇلى حاسانعاليەۆ 1940-جىلى 13- اقپاندا باتىس قازاقستان وبلىسىندا تۋعان.

1959-جىلى قۇرمانعازى اتىنداعى الماتى مەملەكەتتىك كونسەرۆاتورياسىنىڭ ۆوكالدى-حور فاكۋلتەتىن، 1978-جىلى ءال-فارابي اتىنداعى شىمكەنت مادەنيەت ينستيتۋتىن ءبىتىردى.

ءومىرىن ونەرگە ارناعان حاسانعاليەۆتىڭ «اتامەكەن»، «ادەمى»، «اسىل ارمان»، «ءومىرىمنىڭ جازى»، «ەسكىرمەگەن ماحاببات» اندەرىن بىلمەيتىن قازاق جوق.

ەسكەندىر حاسانعاليەۆ - قازاقتىڭ ءان ونەرىنە زور ۇلەسىن قوسقان سازگەر. ونىڭ رەپەرتۋارىنداعى اۆتورلىق تۋىندىلارى ەل جۇرەگىنەن ويىپ تۇرىپ ورىن العان. شىعارماشىلىق عۇمىرىندا ورىس، تاتار، نەمىس اقىندارىنىڭ ولەڭدەرىنە دە ءان جازعان. 200 گە جۋىق ءان، رومانس جانە حورعا ارنالعان شىعارمالاردىڭ اۆتورى بولدى.

ەسكەندىر حاسانعاليەۆ پەن جۇبايى داريكو حاسانعاليەۆانىڭ ەكى قىزى مەن ءبىر ۇلى بار. بۇعان دەيىن داڭقتى ءانشىنىڭ ومىردەن وتكەنىن حابارلاعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى