«سامۇرىق- قازىنا» قىتايدىڭ ۆاكسيناسىن ساتىپ الۋىنا قاتىستى تۇسىنىكتەمە بەردى
«ۆاكتسينا تاڭداۋعا قاتىستى ماسەلەنى «سامۇرىق- قازىنا» ءوزى ايقىندامايدى. بۇل «س ق- فارماتسيا» مەن دەنساۋلىق ساقتاۋ مينيسترلىگىنىڭ قۇزىرەتى اياسىنا كىرەدى. ياعني، ولار مۇنداي شەشىمدى قاجەتتى كولەمدە ۆاكسينانىڭ بولۋىنا، لوگيستيكا مەن تەمپەراتۋرا رەجيمىنە بايلانىستى قابىلداعان سياقتى. «سامۇرىق- قازىنا» قورى 1 ميلليون دوزا ساتىپ الۋعا تولەم جاسايدى جانە قازىردەن- اق جەتكىزۋ باستالدى»، - دەدى اگەنتتىك تىلشىسىنە «سامۇرىق- قازىنا» ۇ ءا ق قوعاممەن بايلانىس جانە ماركەتينگتىك كوممۋنيكاتسيالار دەپارتامەنتىنىڭ ديرەكتورى مارات مۇحامەدساليموۆ.
ونىڭ اتاپ وتۋىنشە، 1 ميلليون دوزا ۆاكسينا ساتىپ الۋعا 31,1 ميلليون دوللار قارجى جۇمسالدى. «بۇگىن ۆەدومستۆوارالىق كوميسسيا وتىرىسىندا 120 مىڭ دوزا قازاقستان بويىنشا «سامۇرىق- قازىنا» كومپانيالار توبىنىڭ جۇمىسشىلارىنا ەگىلەتىندىگى تۋرالى شەشىم قابىلداندى. ياعني، وندىرىستىك كومپانيالار مەن فيليالداردا ەڭبەك ەتەتىن مۇنايشىلار، ەنەرگەتيكتەر، پوشتا قىزمەتكەرلەرى، ۇشقىشتار، ستيۋاردەسسالار الادى. ال قالعان 880 مىڭ دوزا بارلىق قازاقستاندىققا، نيەت بىلدىرگەن ادامدارعا قولجەتىمدى.
باستاپقىدا بۇل ۆاكسينا «سامۇرىق- قازىنا» كومپانيالار توبىنىڭ جۇمىسشىلارى ءۇشىن ساتىپ الىندى دەگەن اقپارات تاراعان بولاتىن ول دۇرىس ەمەس، قاتە اقپارات»، - دەدى ول.
ايتا كەتەيىك، بۇعان دەيىن «س ق- فارماتسيا» «سامۇرىق- قازىنا» ۇلتتىق ءال- اۋقات قورى ا ق ۇجىمىن ۆاكسيناتسيالاۋ ءۇشىن 1000000 دوزا مولشەرىندە كوروناۆيرۋستىق ينفەكسياعا قارسى Hayat-Vax اكسيناسىنىڭ پارتياسىن ساتىپ العانىن حابارلاعان ەدىك.
قىتايدىڭ «Sinopharm» كومپانياسى بىرىككەن اراب امىرلىكتەرىندە وندىرگەن Hayat-Vax كوروناۆيرۋستىق ينفەكسياسىنا قارسى ۆاكسيناسى 2 +- 8+ گرادۋستا ساقتالادى. 1 ادامعا ۆاكسينانىڭ 2 دوزاسىن ەنگىزۋ ۇسىنىلادى، ەكىنشى دوزا ءبىرىنشى ينەكسيادان كەيىن 14 كۇننەن سوڭ جۇرگىزىلەدى.
