قازاقستاننىڭ تۇركياداعى قۇرمەتتى كونسۋلى ومىردەن وزدى
بۇل جايىندا قازاقستاننىڭ تۇركياداعى توتەنشە جانە وكىلەتتى ەلشىسى ابزال ساپاربەك ۇلى Facebook پاراقشاسىندا ءمالىم ەتتى.
«قىمباتتى دوستار، جەكە ءوز جانۇيام جانە قازاقستاننىڭ تۇركياداعى ەلشىلىگى ءۇشىن اۋىر سۋىت حابارمەن بولىسكەلى وتىرمىن. تۇركيانىڭ نيەۆشەحير پروۆينتسياسىندا 2009 -جىلدان بەرى ەلىمىزدىڭ قۇرمەتتى كونسۋلى بولىپ كەلە جاتقان تاماشا، اقكوڭىل ازامات، ادال دوس، تۇرىكتىڭ بەلگىلى ىسكەر ادامى حاليل ۋلۋەر مىرزانىڭ بۇگىن كەشكى ۋاقىتتا جول اپاتىنان قازا تاپقانىن تەرەڭ كۇيزەلىسپەن ءبىلدىم. حاليل ۋلۋەر - تەك ءوز ەلىنىڭ ەمەس، قازاق حالقىنىڭ ناعىز جاناشىر دوسى ەدى. قازاقستاننىڭ كوك تۋىن تۇرىك جۇرتىندا ءاردايىم جەلبىرەتىپ، قازاقستان ءۇشىن ماقتان تۇتاتىن ءبىرتۋار ازامات ەدى. پاندەميا كەزىندە وسىنداعى ستۋدەنتتەرگە قول ءۇشىن اياماي كومەكتەسىپ جۇرگەن بولاتىن. قازاقستانعا پاندەميا كەزىندە گۋمانيتارلىق كومەك جولداپ، قول ۇشىن بەرگەندەردىڭ الدىڭعى شەبىندە ەدى. ەلىمىزگە ينۆەستيتسيا تارتۋ ءۇشىن كۇندىز- ءتۇنى بىرگە كەزدەسۋلەر وتكىزىپ، كەلىسسوز جۇرگىزدى. اتتەڭ، تاعدىر ونى بىزگە قيمادى. قاسيەتتى ورازا ايىندا اللا تاعالا كەشىرىمى مەن مەيرىمىن جازسىن» دەپ جازدى ابزال ساپاربەك ۇلى.
