ماڭعىستاۋدا ارقار اتقان پوليتسەيلەر جۇمىستان بوساتىلدى - ۆيدەو
زاڭدى بەلشەسىنەن باسقانداردىڭ جۇمىستان شىعارىلعاندىعى تۋرالى ماڭعىستاۋ وبلىسىنىڭ پوليتسيا دەپارتامەنتىنىڭ باسشىسى جاناربەك باقتىبايەۆ ءمالىم ەتتى، دەپ حابارلايدى قازاقپارات ءتىلشىسى. الەمجەلىدە جەلدەي ەسكەن كادرلار كوپتىڭ جاعاسىن ۇستاتتى.
تاسپادا قاسكويلەر تابيعات قورعاۋشىلارىن كورە سالا، قاشا جونەلگەن. كەيىن انىقتالعانداي بەت- ءجۇزىن بۇركەگەن ءتورت براكونەردىڭ ەكەۋى پوليتسيا قىزمەتكەرى بولىپ شىقتى. قازىر ارقار اتقان اڭشىلار ۇستالدى.
«شەتپە اۋىلىنىڭ ءتورت ازاماتى، ءارقايسىنىڭ قولىندا ءبىر-بىردەن مىلتىق بولعان. كولىكتى تەكسەرۋ، قارۋ-جاراقتى الۋ، ولجالاعان ءونىمنىڭ حاتتاماسى تولتىرىلىپ، ماڭعىستاۋ اۋدانىنىڭ پوليتسيا بولىمىنە تاپسىرىلدى. ىشىندە ەكى پوليتسيا قىزمەتكەرى بار ەكەنى بەلگىلى بولدى. تابيعات قورعاۋشىلارىنىڭ مالىمەتىنشە، زاڭسىز اڭ اۋلاۋعا شىققان ءتارتىپ ساقشىلارى ينسپەكتورلاردى سوزگە تارتىپ، جازادان قۇتىلىپ كەتۋگە ارەكەتتەنگەن»، - دەدى، «قىزىلساي» مەملەكەتتىك وڭىرلىك تابيعي پاركىنىڭ ديرەكتورى ومار سارسەنعازيەۆ.
قاسكويلەر ەرەكشە قورعالاتىن «قىزىلساي» تابيعي پاركىنىڭ اۋماعىندا كولىكپەن ەمىن-ەركىن جۇرگەن. تابيعات قورعاۋشىلارى براكونەرلەردى 100 شاقىرىمداي قۋىپ ءجۇرىپ ۇستاعان. مامانداردىڭ ايتۋىنشا، كولىكتەن ءتورت اڭشى مىلتىعى مەن جابايى اڭنىڭ ەتى تاركىلەنگەن. قازىر قىزىل كىتاپقا ەنگەن ءتۇز تاعىسىن اتقاندارعا قاتىستى قىلمىستىق ءىس قوزعالدى.
