كوۆيدتەن ءتورت مينۋت سايىن ءبىر ناۋقاس كوز جۇمادى

ءبىراق كەيىنگى 5 كۇندەگى كورسەتكىشتەر تىپتەن جاعا ۇستاتارلىق. تاۋلىكتىك ءوسىم 300 مىڭنان تۇسپەي تۇر. مۇنداي جاعداي الەمنىڭ ءبىر دە ءبىر ەلىندە تىركەلمەگەن.

ساراپشىلار وسىلاي جالعاسا بەرەتىن بولسا، مامىردا تاۋلىكتىك كورسەتكىش جارتى ميلليونعا جەتەتىنىن توپشىلاپ وتىر. وندا دەنساۋلىق ساقتاۋ سالاسىنىڭ قانداي كۇيدە بولارىن بولجاۋ قيىن.

قازىردىڭ وزىندە جاعداي كۇردەلى. اۋرۋحانالاردا ناۋقاستاردى جاتقىزاتىن ورىن جوق. ستاتيستيكا بويىنشا قازىر ەل استاناسى نيۋ-دەليدە ءار 4 مينۋت سايىن كوروناۆيرۋستان ءبىر ادام كوز جۇمادى ەكەن.

تۋشار ماۋريا، نيۋ-دەلي تۇرعىنى:

- قازىرگى جاعدايدى سوزبەن ايتىپ جەتكىزۋ مۇمكىن ەمەس. اۋرۋحانادا ورىن جوق. وبالى نە كەرەك، دارىگەرلەر كومەگىن ايامايدى. ءبىراق ولار ۇلگىرمەي جاتىر. سوندىقتان ناۋقاستار كەزەگىن كۇتىپ سىرتتا جاتۋعا ءماجبۇر.

باسقالارعا ايتارىم: ەگەر سىزدە كوروناۆيرۋس ورتاشا نە جەڭىل فورمادا ءوتىپ جاتسا، اۋرۋحانا ماڭىنا جولاماي-اق قويىڭىز. ويتكەنى مۇندا كەلۋدىڭ ءوزى قاۋىپتى. ءدال قازىر الەمدە تىركەلىپ جاتقان ۆيرۋس جۇقتىرۋ وقيعالارىنىڭ شامامەن جارتىسى وسى ءۇندىستانعا تيەسىلى. سوندا ەپيدەميولوگيالىق احۋالدىڭ وسىلاي ۋشىعۋىنا نە سەبەپ دەگەن ساۋال تۋىندايدى.

ول ۆيرۋستىڭ قوس مۋتاتسياعا ۇشىراعان جاڭا تۇرىمەن بايلانىستى بولۋى مۇمكىن. سونداي-اق تۇرعىنداردىڭ ساقتىققا سالعىرت قاراۋى دا كەسىرىن تيگىزبەي قويمادى. ماسەلەن، ناۋرىزدىڭ سوڭىندا مۇندا حولي مەرەكەسى ءوتتى. بيلىكتىڭ ەسكەرتۋىنە قاراماستان جۇرت كوپ ادام بولىپ جينالىپ، ءان ايتىپ، ءبي بيلەۋمەن الەك بولعان. ال جاقىندا شەكتەۋ شارالارىن ەلەمەگەن ميلليونعا جۋىق ءۇندى كۋمبحا مەلا مەيرامىنا وراي گانگ وزىنىنە ءتۇسىپ، ءدىني ءراسىم وتكىزگەن. قازىر اۋرۋحانالاردا جاعدايى اۋىر ناۋقاستاردىڭ تىنىس الۋى ءۇشىن اسا قاجەتتى وتتەگىنىڭ وتكىر تاپشىلىعى تۋىندادى.

نيۋ-دەليدە ءبىر تۇندە 25 ناۋقاس باللوندار جەتكەنشە جان ءتاسىلىم ەتكەن. جاقىندارىنىڭ قينالىپ جاتقانىن كورگەن كەيبىر تۇرعىندار اۋرۋحانا قويماسىنان باللونداردى ۇرلاپ اكەتكەن جاعدايلار دا بار.

الايدا ماماندار مۇنىڭ اقىلعا قونىمسىز ارەكەت ەكەنىن ايتادى. ويتكەنى تۇرعىندار وتتەگى باللوندارىن قولدى ەتكەنىمەن ونى قالاي قولداناتىنىن بىلمەيدى.

ەندى بىرەۋلەر بۇل قۇرىلعىنى قارا بازاردان ساتىپ الۋعا ءماجبۇر.

نيۋ-دەلي تۇرعىنى:

- مەنىڭ اكەم 70 تە. كەشە وعان 40 مىڭ رۋپيگە وتتەگى باللوننىن ساتىپ الدىم. قازىر ول بوس تۇر. اۋرۋحاناداعى جاعداي قالاي ەكەن دەپ كەلسەم، مۇندا سۇمدىق بولىپ جاتىر. نە ورىن، نە وتتەگى جوق. قازىر باللونداردى ءتىپتى قارا بازاردان ساتىپ الۋدىڭ ءوزى قيىنداپ كەتتى.

ارۆيند كەدجريۆال، نيۋ-دەليدىڭ باس ءمينيسترى:

- وتتەگى جەتىسپەي جاتىر. ماسەلەن، 700 توننا كەرەك بولسا، ءبىز تەك 480 تونناسىن عانا الدىق. كەشە تاعى 10 تونناسى كەلدى. ءبىراق سوندا دا بۇل وتە از. الەم ەلدەرى ءۇندىستانعا كومەك قولىن سوزۋعا ءازىر ەكەنىن جەتكىزدى. ولاردىڭ قاتارىندا ۇلى بريتانيا، ا ق ش پەن گەرمانيا بار.

بريتاندىقتار وكپەنى جاساندى جەلدەتۋ اپپاراتتارى مەن وتتەگى باللوندارىن جونەلتتى. ا ق ش پەن گەرمانيا بيلىگى دە وسىنداي كومەك كورسەتپەك. ال ەۋرووداق وكىلدەرى دە ءدارى-دارمەك پەن وتتەگىن جىبەرەمىز دەپ وتىر.

دومينيك رااب، ۇلى بريتانيا سىرتقى ىستەر ءمينيسترى:

- ءبىز بارلىعى 600 دانا وكپەنى جاساندى جەلدەتۋ اپپاراتى، مەديتسينالىق جابدىق پەن وتتەگى كونتسەنتراتورىن جىبەردىك. ءۇندى حالقىنىڭ قازىر قانداي جاعدايدا قالعانىن كورىپ وتىرمىز. بۇل ۇلى بريتانيا كومەگىنىڭ العاشقى پارتياسى. الدا تاعى دا شامامىز كەلگەنشە جاردەم بەرەتىن بولامىز. حالىقارالىق كومەك كەلىپ جاتىر.

جەرگىلىكتى بيلىكتە قول قۋسىرىپ وتىرعان جوق. وتتەگى وندىرەتىن جارتى مىڭنان اسا ستانتسيا قۇرىلاتىنىن ايتتى.

پرەمەر-مينيستر ولاردى مۇمكىندىگىنشە قىسقا ۋاقىت ىشىندە اشۋدى تاپسىردى. ودان بولەك سۇيىق وتتەگىن مەديتسينالىق ەمەس ماقساتتا قولدانۋعا تىيىم سالىندى.

مۋكەشي پاتەل، زاۋىت ديرەكتورى:

- پاندەميا كەزىندە وتتەگىنە دەگەن سۇرانىس ارتىپ كەتتى. قازىر تىپتەن جاعداي قيىن. سول ءۇشىن وتتەگىنى تەك مەديتسينادا قولدانىپ جاتىرمىز. ياعني ونەركاسىپتىك ماقساتتا پايدالانۋعا رۇقسات جوق. كوروناۆيرۋس جۇقتىرعانداردان بولەك بۇل ەلدە كوز جۇمعاندار دا وتە كوپ. سوڭعى 5 كۇندە 12 مىڭ ادام قايتىس بولعان.

تيىسىنىشە كرەماتورييلەردىڭ جۇمىسى قاۋىرت. سالدارىنان مارقۇمداردىڭ دەنەسىن كوشەدە ورتەۋگە تۋرا كەلەدى.

پانكادج پاندەي، كرەماتوري قىزمەتكەرى:

- كوروناۆيرۋستان كوز جۇمعاندار وتە كوپ. كەشە ءبىزدىڭ كرەماتوريگە 30 ادامنىڭ دەنەسى كەلدى. بۇگىن تاعى 20 مارقۇم بار.

دجيتەندەر سينگح شانتي، مەديتسينالىق ورتالىق باسشىسى:

- كرەماتوريدە ورىن جوق. سوندىقتان ءبىز مارقۇمداردىڭ دەنەسىن مىنا جەردە ورتەۋگە ءماجبۇرمىز. مۇندا بۇرىن كولىك قوياتىن ورىن بولعان. بيلىكتەن رۇقسات الدىق. الايدا مارقۇمدار سانى ارتىپ بارادى. وتىن تەز تاۋسىلىپ جاتىر.

24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى