اۋىل اكىمىن سايلاۋ يدەياسىن دەۆالۆاتسياعا ۇشىراتىپ الماۋىمىز كەرەك - دەپۋتات
«تاعايىندالعان اكىم مەن سايلانعان اكىمنىڭ اراسى جەرمەن كوكتەي. تاعايىندالاتىن اكىمدى اۋدان اكىمىنىڭ ۇسىنىسىمەن ءماسليحات بەكىتە سالادى. ياعني، ونىڭ سايلانۋىنا 14-15 ادام سەپ بولدى دەگەن ءسوز. ال سايلانعان اكىم ەڭسەلى جۇرەدى. جالپى وسى ورايدا ەكى ماسەلەنى قامتاماسىز ەتكەن ءجون سياقتى. ءبىرىنشى - زاڭنامادا دۇرىس ادامداردىڭ سايلانۋىنا مۇمكىندىك بەرۋ. ەكىنشى - قاراپايىم ادامنان اكىمگە اينالعان تۇلعالارعا بيۋدجەتتىك قاتىناستار، مەملەكەتتىك ساتىپ الۋلار، سالىق ماسەلەرىنە قاتىستى سەمينارلار وتكىزۋ»، - دەدى ءماجىلىس دەپۋتاتى سىبايلاس جەمقورلىققا قارسى ءىس-قيىل اگەنتتىگىنىڭ باسپا ءسوز قىزمەتى الاڭىندا وتكەن بريفينگ بارىسىندا.
ونىڭ اتاپ وتۋىنشە، اۋىل، اۋدان، وبلىس اكىمدەرىن سايلاۋ وتە ۇلكەن يدەيا، حالىق پەن بيلىكتىڭ اراسىن جامايتىن ۇلكەن دۇنيە سانالادى.
«سول يدەيانى ديەۆالۆاتسياعا ۇشىراتىپ الماۋىمىز كەرەك. مىسالى، ەرتەڭ اكىمدەر سايلانعاننان كەيىن قولىندا دىم جوق بولسا، 1-2 -جىل جۇرەدى دە، ءوتىنىشىن جازىپ تاستاپ كەتە بەرەدى. تاعى سايلايدى، باسقا كەلەدى نەمەسە حالىقتىڭ ءوزى العاشقى كەزدە پوپۋليستەرگە، ەكىنشى كەزەكتە تۋعان- تۋىسىنا، رۋلاسىنا داۋىس بەرەدى. ءسويتىپ، اۋىلدىڭ تىنىس- تىرشىلىگى بۇرىعىدان بەتەر ناشارلاپ كەتەتىن بولسا، وندا يدەيا جوققا شىقتى دەگەن ءسوز. ياعني، قوعام تاراپىنان دا، سايلاۋعا قاتىساتىن پارتيالار مەن بەلسەندى توپتاردىڭ دا جاۋاپكەرشىلىگى قاجەت»، - دەدى ايدوس سارىم. ءماجىلىس دەپۋتاتى ەلدى مەكەندەردە قايتادان اۋىلدىق كەڭەستەردى قايتادان جاڭعىرتۋ قاجەتتىگىن ايتادى.
«اۋدان اكىمى قابىلداعان شەشىمدەردى اۋىلدىق كەڭەستىڭ 5-7 ادام بەكىتىپ وتىرسا دۇرىس بولار ەدى. سوندا اۋىل اكىمى «شەشىمىم نەگىزدەلگەن، قوعامنىڭ تالقىسىنان وتكەن، وكىلەتتى ورگان بەكىتتىك بەرگەن» دەپ قورىقتاي جۇمىس ىستەيتىن ەدى. ال قازىر اكىمدى بۇكىل حالىقپەن جالعىز قالدىرۋ نەمەسە بۇكىل بيۋروكراتيالىق ماشيناعا قارسى قويۋ قيانات بولار. اۋىل اكىمدەرىن سايلاۋ تاريحي، ساياسي ۇلكەن ماڭىزى بار، قازاقستانداعى ءوزىن ءوزى باسقارۋ جۇيەسىن دامىتۋعا ۇلەس قوسار دۇنيە دەيتىن بولساق، وندا وعان جان-جاتقان تىرەۋ بولىپ، كومەكتەسۋىمىز قاجەت»، - دەدى ول.
اۆتور: مارلان جيەمباي
