اتىراۋدا بالالارىنىڭ كوزىنشە ىشىمدىك ىشكەن ايەلدىڭ قۇقىعى شەكتەلەدى
وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 21-23-ساۋىردە «جانۇيا جانە بالا» جەدەل الدىن الۋ ءىس- شاراسى وتكىزىلگەن. ءىس- شارا كەزىندە يۋۆەنالدى پوليتسيا ءبولىمىنىڭ ينسپەكتورلارى «جايسىز وتباسى» ساناتىندا ەسەپتە تۇرعان تۇلعالاردىڭ تۇرمىستىق جاعدايىن زەردەلەپ، تۇسىنىك جۇمىسى جۇرگىزىلگەن.
«ماسەلەن، 21-ءساۋىر ساعات 16:00 شاماسىندا اتىراۋ قالاسىنىڭ تۇرعىنى 102 وپەراتورىنا حابارلاسىپ، سارايشىق كوشەسىندەگى ۇيلەردىڭ بىرىندە تۇراتىن جاستاعى ايەلدىڭ كامەلەتكە تولماعان بالالارىنىڭ تاربيەسىمەن اينالىسپاي جۇرگەنى تۋرالى حابار بەرگەن. اتالعان دەرەكتى تەكسەرۋ كەزىندە 1976 -جىلى تۋعان ازاماتشانىڭ كامەلەتكە تولماعان بالالارىنىڭ كوزىنشە الكوگولدى ىشىمدىك ءىشىپ، بالا تاربيەسىمەن اينالىسپاعانى انىقتالدى. بۇل ايەل بيىلعى قاڭتاردا «جايسىز وتباسى» ەسەبىنە الىنعان. ونىڭ تاربيەسىندە 12 جانە 17 جاستاعى بالالارى بار. وسى ۋاقىتقا دەيىن ايەل ءدال وسىنداي اكىمشىلىك قۇقىقبۇزۋشىلىق جاساعانى ءۇشىن اكىمشىلىك جاۋاپكەرشىلىككە تارتىلعان» دەپ حابارلادى دەپارتامەنتتىڭ باسپا ءسوز قىزمەتىنەن.
بالالارىنىڭ تاربيەسىنە كەرى اسەر ەتەتىن ءىس- ارەكەتتەردى جاساپ، كامەلەتكە تولماعان بالالارىن تاربيەلەۋ مەن وقىتۋداعى اتا- انالىق مىندەتىن ورىنداماعان ايەلگە ق ر اكىمشىلىك قۇقىق بۇزۋ كودەكسىنىڭ 127-بابىنىڭ 2-بولىمىمەن اكىمشىلىك حاتتاما تولتىرىلعان. ەندى جيناقتالعان ءىس- قۇجاتتار اتالعان ازاماتشانىڭ اتا- انالىق قۇقىعىن شەكتەۋ تۋرالى ۇسىنىسپەن شەشىم قابىلداۋ ءۇشىن اتىراۋ قالالىق اكىمدىگى جانىنداعى كامەلەتكە تولماعانداردىڭ قۇقىعىن قورعاۋ كوميسسياسىنا جولدانادى.
