وتكەن عاسىرلاردىڭ بارلىق قۇپيالارى اشىلدى - ەگيپەتتىڭ ەجەلگى ىستەر مينيسترلىگى
ەگيپەتتىڭ ەجەلگى ىستەر مينيسترلىگىنىڭ وتىرىسىندا ۆەدومستۆو باسشىسى سەنساتسيالىق مالىمدەمە جاسادى.
حالەد ءال- ءانانيدىڭ ايتۋىنشا، وتكەن عاسىرلاردىڭ بارلىق قۇپيالارى اشىلدى دەۋگە بولادى. ءبىراق كەمى 10 جىل كۇتۋگە تۋرا كەلەدى. ويتكەنى جەرگىلىكتى ارحەولوگتار جاقىندا تابىلعان «التىن شاھاردى» ءجىتى زەرتتەۋگە ءدال وسىنشاما ۋاقىت سۇراپ وتىر.
عالىمداردىڭ ايتۋىنشا، كونە قالادا ەگيپەتتى ءبىزدىڭ زامانىمىزعا دەيىنگى 14 - عاسىردا بيلەگەن امەنحوتەپ ءۇشىنشى ءومىر سۇرگەن. فاراوننىڭ تۇسىندا وزگە يمپەريالارمەن ساۋدا- ساتتىق قىزا تۇسكەن، جۇزدەگەن جاڭا شاھار سالىنىپ، التىننان ەسكەرتكىشتەر مەن مۇسىندەر جاساۋ سانگە اينالعان. بۇل ەجەلگى ەگيپەت وركەنيەتىنىڭ ورلەۋ زامانى سانالادى.
سۋاد سالاح، ارحەولوگ:
- ءبىز سول كەزدەگى التىننىڭ ءبىر بولگىن تاپساق دەپ ۇمىتتەنىپ وتىرمىز. امەنحوتەپ فاراونى كەزىندە داڭعازالىق قالىپتى نارسە سانالاتىن. ادامدار التىن كەسەكتەرىن سىي رەتىندە تارتا الاتىن. فاراون قازىرگى تىلمەن ايتقاندا بيزنەس سەرىكتەستەرىنە باعالى زاتتاردى ساندىقپەن نە الىپ مۇسىندەر رەتىندە جىبەرەتىن. ءبىز سول قازىنانى تاۋىپ الساق، شىنىمەن دە فاراوندار التىنى بولعان با، جوق پا دەگەن سۇراققا جاۋاپ تابار ەدىك.
«التىن شاھار» 3 جارىم مىڭ جىل بۇرىن پايدا بولسا كەرەك. ول ءنىل وزەنىنىڭ باتىس جاعالاۋىندا ورنالاسقان. ارحەولوگتار بۇل تۋتانحامون مازارىنان كەيىن ماڭىزدىلىعى بويىنشا ەكىنشى ءىرى تاريحي ولجا ەكەنىن ايتادى. نەگىزى، كونە شاھاردىڭ عيماراتتارى جاقسى ساقتالعان. كەيبىر ۇيلەردىڭ بيىكتىگى 3 مەترگە دەيىن جەتكەن. مۇنى ەجەلگى زامانعى ولشەۋلەر بويىنشا ءزاۋلىم عيماراتقا تەڭەستىرۋگە بولادى.
ساميا كاحرابا، حۋرگادا ۋنيۆەرسيتەتىنىڭ اعا وقىتۋشىسى:
- كەزىندە بۇل شاھار ەڭ ءىرى اكىمشىلىك جانە ونەركاسىپتىك ورىنداردىڭ ءبىرى بولعان. نەلىكتەن ەجەلگى ەگيپەت استاناسى بىرنەشە جىلعا امارناعا اۋىستىرىلدى؟ دەگەن ساۋال - تاريحتىڭ باستى سۇراقتارىنىڭ ءبىرى. تابىلعان جادىگەرلەر سونىڭ جاۋابىن تابۋعا كومەكتەسەدى دەپ ويلايمىز.
ارحەولوگتار «التىن شاھار» ماڭىنان زيرات تا تاپقان. ولاردىڭ پايىمداۋىنشا، بۇل قاراپايىم حالىقتى جەرلەۋگە ارنالعان ورىن بولعان. الايدا وسى كۇنگە دەيىن ساقتالىپ قالعان قۇجاتتار بويىنشا مۇندا اسىل زاتتارعا تولى مازارلار مەن فاراونداردىڭ سارايلارى بولۋى مۇمكىن.
www.24.kz
