قاسىم-جومارت توقايەۆ جول اپاتىنىڭ جيىلەۋىنە الاڭداۋشىلىق تانىتتى

اتىراۋ وبلىسىنىڭ الەۋمەتتىك-ەكونوميكالىق دامۋ ماسەلەلەرى جونىندەگى كەڭەستە مەملەكەت باسشىسى قاسىم-جومارت توقايەۆ «ورال- اتىراۋ» تاس جولىنا باسا نازار اۋدارۋدى تاپسىردى، دەپ حابارلايدى قازاقپارات ءتىلشىسى.

«ايماقتاعى رەسپۋبليكالىق ماڭىزى بار جولداردىڭ 85 پايىزى جانە وبلىستىق ماڭىزى بار جولداردىڭ 61 پايىزىنىڭ احۋالى ورتاشا نەمەسە جامان ەمەس دەۋگە بولادى. ءبىراق، بۇل - ورتاشا رەسپۋبليكالىق كورسەتكىشتەن تومەن. ساپالى جول - قاۋىپسىزدىك كەپىلى. وبلىستا جول اپاتىنىڭ جيىلەپ كەتۋى ءبارىمىزدى، ەڭ الدىمەن، جەرگىلىكتى ازاماتتاردى الاڭداتادى. بىلتىر وڭىردە 232 جول-كولىك وقيعاسى بولدى. سونىڭ سالدارىنان 69 ادام، سونىڭ ىشىندە 6 بالا قايتىس بولدى. مۇنداي احۋال جىل سايىن قايتالانۋدا. اسىرەسە، «ورال- اتىراۋ» تاس جولىنا باسا نازار اۋدارعان ءجون»، - دەدى ق ر پرەزيدەنتى.

مەملەكەت باسشىسىنىڭ اتاپ وتۋىنشە، وكىنىشكە قاراي، بۇل جول ادام ومىرىنە ۇنەمى ءقاۋىپ ءتوندىرىپ وتىر. بيىلعى ەكى اي ىشىندە وسى جولدىڭ بويىندا 7 جول-كولىك وقيعاسى بولىپ، 17 ادام قازاعا ۇشىرادى. سونداي-اق، 15 ادام زارداپ شەكتى. ءبىر عانا جول اپاتىنان 15 بالا جەتىم قالدى.

«بۇنداي جاعدايعا جول بەرمەۋىمىز كەرەك. ۇكىمەت پەن وڭىردەگى اكىمدىكتەردىڭ مىندەتى - جول قاۋىپسىزدىگىن بارىنشا قامتاماسىز ەتۋ. «ورال- اتىراۋ» تاس جولىنىڭ ايماق ءۇشىن ستراتەگيالىق ماڭىزى زور. بارلىق جولاۋشى جانە جۇك تاسىمالى وسى جول ارقىلى وتەدى. اۆتوجولدىڭ بويىندا كولىك تۇراعى جوقتىڭ قاسى. شىن مانىندە، جولدىڭ ساپاسى كوڭىل كونشىتپەيدى. رومان ۆاسيليەۆيچ، اكىمدىك اۆتوموبيل جولدارىن دامىتۋعا شامامەن 12 ميلليارد تەڭگە سۇراپ وتىرعانىن بىلەمىن. سوما از ەمەس. شىنايى قاجەتتىلىكتى تىڭعىلىقتى ەسەپتەۋدى جانە قارجىلاندىرۋ ماسەلەسىن شەشۋدى وتىنەمىن»، - دەدى ق ر پرەزيدەنتى ۇكىمەت باسشىسىنىڭ ورىنباسارى رومان سكليارعا.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى