ءولىم جازاسىنىڭ كۇشىن جويۋ بويىنشا زاڭ جوباسى پارلامەنت قاراۋىنا ەنگىزىلەدى
«جىل باسىندا قازاقستان ءولىم جازاسىنىڭ كۇشىن جويۋعا باعىتتالعان حالىقارالىق پاكتىگە ەكىنشى فاكۋلتاتيۆتىك حاتتامانى راتيفيكاتسيالادى. ونى جۇزەگە اسىرۋ تۇرعىسىندا قىلمىستىق كودەكسكە ءتيىستى تۇزەتۋلەردى پىسىقتاۋ تالاپ ەتىلدى. وسى ورايدا بۇل باعىتتاعى جۇمىستار قاي كەزەڭدە تۇر؟»، - دەپ سۇرادى سەناتور سەرگەي ەرشوۆ.
ءوز كەزەگىندە ق ر باس پروكۋرورىنىڭ ءبىرىنشى ورىنباسارى بەرىك اسىلوۆ بۇل رەتتە زاڭ جوباسىنىڭ كونتسەپتسياسى ازىرلەنگەنىن اتاپ ءوتتى.
«كونسەپتسيا نورماتيۆتى- قۇقىقتىق اكتىلەردىڭ قوعامدىق پورتالدارىندا تالقىلاندى. اقپان ايىندا ۆەدومستۆوارالىق كوميسسيا ءوتىپ، ۇكىمەت ونى ماقۇلدادى. قازىرگى كەزدە باس پروكۋراتۋرا تاراپىنان زاڭ جوباسى دايارلاندى جانە قۇجات ساراپتامادان ءوتىپ جاتىر. ياعني ەكونوميكالىق، لينگۆيستيكالىق، سىبايلاس جەمقورلىققا قارسى باعىتتار بويىنشا تالداۋ جاسالادى. ءتيىستى قورىتىندىنى العاننان سوڭ، ونى ۇكىمەتكە، سودان كەيىن سىزدەرگە تانىستىرامىز. شامامەن مامىر- ماۋسىم ايلارىندا جوسپارلاپ وتىرمىز»، - دەدى بەرىك اسىلوۆ سەناتوردىڭ سۇراعانىنا جاۋاپ بەرە وتىرىپ.
ەسكە سالايىق، 23-قىركۇيەكتە بىرىككەن ۇلتتار ۇيىمىنىڭ شتاب-پاتەرىندە قازاقستاننىڭ ب ۇ ۇ جانىنداعى تۇراقتى وكىلى قايرات وماروۆ ءولىم جازاسىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىنىڭ ەكىنشى فاكۋلتاتيۆتىك حاتتاماسىنا قول قويدى. كەيىننەن ق ر سىرتقى ىستەر مينيسترلىگىنىڭ باسپا ءسوز قىزمەتى قازاقستاننىڭ اتالمىش حالىقارالىق پاكتىگە قوسىلۋىنا قاتىستى تۇسىنىكتەمە بەردى.
ايتا كەتەيىك، 2020 -جىلدىڭ جەلتوقسان ايىندا پارلامەنت سەناتىنىڭ جالپى وتىرىسىندا «ءولىم جازاسىنىڭ كۇشىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىگە ەكىنشى فاكۋلتاتيۆتىك حاتتامانى راتيفيكاتسيالاۋ تۋرالى» زاڭى قابىلداندى.
2003 -جىلى ءولىم جازاسىن قولدانۋعا موراتوري ەنگىزىلگەننەن كەيىن، ءبىزدىڭ ەلدە جوعارى جازا شاراسىن قولدانباۋدىڭ تۇراقتى قۇقىقتىق رەجيمى قالىپتاسقان. 2021 -جىلدىڭ باسىندا مەملەكەت باسشىسى «ءولىم جازاسىنىڭ كۇشىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىگە ەكىنشى فاكۋلتاتيۆتىك حاتتامانى راتيفيكاتسيالاۋ تۋرالى» قازاقستان رەسپۋبليكاسىنىڭ زاڭىنا قول قويدى.
اۆتور: رۋسلان عابباسوۆ
