ەلىمىزدىڭ قۇقىق قورعاۋ ورگاندارى قانشا ادامدى ىزدەستىرۋدە

بۇل تۋرالى سەناتتىڭ جالپى وتىرىسىندا دەپۋتات نۇرلان بەكنازاروۆ ءمالىم ەتتى، دەپ حابارلايدى قازاقپارات ءتىلشىسى.

«جالپى ءتيىستى شارتتار نەگىزىندە 2016 -جىلدان باستاپ 2021 -جىلدىڭ 1-توقسانى ارالىعىندا ەلىمىزدەن 518 ىزدەۋدەگى ادام باسقا ەلدەرگە بەرىلدى. تيىسىنشە ەلىمىزگە ىزدەۋدە جۇرگەن 346 ادام قايتارىلدى. بيىلدىڭ 1-ساۋىردەگى جاعدايى بويىنشا ەلىمىزدىڭ قۇقىق قورعاۋ ورگاندارىمەن ىزدەستىرۋدە 2341 ادام بار، ونىڭ ىشىندە مەملەكەتارالىق ىزدەستىرۋدە - 750, حالىقارالىق ىزدەستىرۋدە - 1591 ادام»، - دەدى سەناتور.

بۇدان بۇرىن حابارلانعانداي، بۇگىن سەناتتىڭ جالپى وتىرىسىندا «قازاقستان رەسپۋبليكاسى مەن سولتۇستىك ماكەدونيا رەسپۋبليكاسى اراسىنداعى ادامداردى ۇستاپ بەرۋ تۋرالى شارتتى راتيفيكاتسيالاۋ تۋرالى» جانە «قازاقستان رەسپۋبليكاسى مەن سولتۇستىك ماكەدونيا رەسپۋبليكاسى اراسىنداعى سوتتالعان ادامداردى بەرۋ تۋرالى شارتتى راتيفيكاتسيالاۋ تۋرالى»، سونداي-اق «قازاقستان رەسپۋبليكاسى مەن سولتۇستىك ماكەدونيا رەسپۋبليكاسىنىڭ اراسىنداعى قىلمىستىق ىستەر بويىنشا ءوزارا قۇقىقتىق كومەك تۋرالى شارتتى راتيفيكاتسيالاۋ تۋرالى» زاڭدارى قابىلداندى.

2019 -جىلى سولتۇستىك ماكەدونيامەن شارتتاردىڭ تولىق پاكەتىنە قول قويىلدى.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى