قىتاي بيلىگى قىسقى وليمپيادا ويىندارى كەزىندە سيفرلىق يۋاندى سىناقتان وتكىزەدى

ب و ا و ازيالىق فورۋمىنداعى سەسسيالاردىڭ بىرىندە قىتاي حالىق بانكى (قۇب، ورتالىق بانك) باسشىسىنىڭ ورىنباسارى لي بو وسىنداي مالىمدەمە جاسادى، دەپ حابارلايدى قازاقپارات مەنشىكتى ءتىلشىسى.

«ءبىز سيفرلىق يۋاندى پايدالانۋدىڭ پيلوتتىق جوبالارى ءۇشىن كوبىرەك سەناري مەن كوپتەگەن قالانى قاراستىرامىز. بەيجىڭدەگى قىسقى وليمپيادا ويىندارى كەزىندە ءبىز وعان شەتەل ازاماتتارىنىڭ قول جەتكىزۋىن قامتاماسىز ەتەمىز»، - دەپ اتاپ ءوتتى لي بو.

«سيفرلىق يۋاندى ىلگەرىلەتۋ ارەكەتتەرى ىشكى پايدالانۋعا باعىتتالعان. ساندىق يۋاندى ينتەرناتسيونالداندىرۋ تۋرالى ايتاتىن بولساق، ءبىز بۇل تابيعي پروتسەسس ەكەنىن جانە ءبىزدىڭ ماقساتىمىز باسقا حالىقارالىق ۆاليۋتالاردى الماستىرۋ ەمەس ەكەنىن بىرنەشە رەت ايتقان بولاتىنبىز. ءبىزدىڭ ماقساتىمىز - نارىققا تاڭداۋ جاساۋعا مۇمكىندىك بەرۋ»، - دەدى ول.

سونداي-اق لي بو قىتاي سيفرلىق يۋان مەن ەكوجۇيەنىڭ ينفراقۇرىلىمىن، ونىڭ ىشىندە تەحنولوگيانى ودان ءارى دامىتىپ، قاۋىپسىزدىك پەن سەنىمدىلىكتى ارتتىرىپ، ونى قولدانۋ ءۇشىن ءتيىستى نورماتيۆتىك-قۇقىقتىق بازانى جاساۋى كەرەك ەكەنىن حابارلادى.

ونىڭ ايتۋىنشا، سيفرلىق يۋاندى ودان ءارى ينتەرناتسيونالداندىرۋ تۇرعىسىنان قىتاي حالىقارالىق سەرىكتەستەرمەن ترانسشەكارالىق تولەمدەر بويىنشا ۇزاق مەرزىمدى شەشىم جاساۋ ءۇشىن جۇمىس ىستەيتىن بولادى.

وتكەن جىلدىڭ قازان ايىنان باستاپ قىتايدىڭ ورتالىق بانكى ەلدىڭ بىرنەشە ايماعىندا، اتاپ ايتقاندا بەيجىڭ، شەنچجەن، سۋچجوۋ جانە چەندۋ قالالارىندا سيفرلىق يۋاندى سىناقتان وتكىزدى.

ەسكە سالا كەتەيىك، بەيجىڭدەگى قىسقى وليمپيادا ويىندارى 2022-جىلدىڭ 4-22- اقپان ارالىعىندا وتەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى