يران بيلىگى يادرولىق كەشەنگە جاسالعان شابۋىل ءۇشىن يزرايلدى ايىپتادى

وندا ۋراندى بايىتاتىن سەنتريفۋگالار بولعان ەدى. جارىلىس سالدارىنان كاسىپورىن ىستەن شىققان. ال يزرايل «بۇعان قاتىسىمىز جوق» دەيدى. دەگەنمەن، بينيامين نەتانياحۋ: «يران تاياۋ شىعىس ايماعىنداعى تۇراقتىلىققا قاۋىپ ءتوندىرىپ تۇر»، دەيدى. بۇل شاحمات ويىنىنا ۇقسايدى، ءبىر تاراپ جاساعان قادامعا ەكىنشىسى جاۋاپ بەرەدى. ويىن الاڭى - قىزىل تەڭىز، ال شاحمات تاستارى رەتىندە كەمەلەر قولدانىلىپ كەلەدى.

ءساۋىر ايىنىڭ باسىندا يراننىڭ بارلاۋ كەمەسىنىڭ تۇبىنە ورناتىلعان مينا جارىلعان بولاتىن. ال جۋىردا يزرايل كومپانياسىنىڭ مەنشىگىندەگى گيپەريو كەمەسىنە زىمىران اتىلدى. بۇل - يرانداعى ناتانزە قالاسىندا بولعان جارىلىسقا قارىمتا دەگەن بولجام بار. سول كەزدە ۋران بايىتاتىن كاسىپورىن ىستەن شىققان ەدى.

دجاۆاد شاريف، يران سىرتقى ىستەر ءمينيسترى:

- بۇل وقيعانى تەرگەۋگە كىرىسىپ كەتتىك. ەگەر بۇل يزرايلدىڭ ءىسى بولىپ شىقسا، جاۋابىن الىپ، جاساعانى ءۇشىن ءالى وكىنەدى. بۇل ارەكەتتەن كەيىن يران ۇستانىمى تەك كۇشەيە تۇسەدى.

كەمەسىنە جاسالعان شابۋىلدان كەيىن يزرايل اسكەري- تەڭىز كۇشتەرىن تولىق دايىندىققا كەلتىردى. پارسى شىعاناعىنا قاناتتتى زىمىراندارمەن قارۋلانعان سۇڭگۋىر قايىقتار اتتاندى. يزرايل يراننىڭ يادرولىق باعدارلاماسىن قاۋىپسىزدىگىنە تونگەن باستى قاۋىپ رەتىندە قاراستىرىپ وتىر. ەل پرەمەر- ءمينيسترى بينيامين نەتانياحۋ يسلام رەسپۋبليكاسىنا اتوم بومباسىن شىعارۋعا جول بەرمەيتىنىن تالاي رەت مالىمدەگەن بولاتىن.

بينيامين نەتانياحۋ، يزرايل پرەمەر- ءمينيسترى:

- يراننىڭ يادرولىق قارۋى مەن قولشوقپارلارىمەن كۇرەس - وتە كۇردەلى مىندەت. بۇگىن كورىپ وتىرعان جاعداي ەرتەڭ دە وسىنداي كۇيدە قالاتىنىن بىلدىرمەيدى. كۇش- الەۋەتى تومەن ەلدەن قازىرگى مەملەكەتتى قالاي قۇرعانىمىزدى ءتۇسىندىرۋ قيىن. بۇل تاريحتا بۇرىن سوڭدى بولماعان جايت.

يرانعا بۇل ماقساتىنا جەتۋ ءۇشىن تالاي كەدەرگى جاسالعان بولاتىن. 2009 -جىلى بەيمالىم كومپيۋتەرلىك ۆيرۋس بۋشەر قالاسىنداعى اتوم ەلەكتر ستانسياسىنىڭ جۇيەلەرىنە زيان كەلتىرگەن ەدى. سوندا ۋران بايىتاتىن ءبىر مىڭعا جۋىق سەنتريفۋگا ىستەن شىقتى. ال 2020 -جىلى يران يادرولىق باعدارلاماسىن باسقارعان فاحريزادە قاستاندىقپەن ءولتىرىلدى. ونىڭ كولىگىنە قاشىقتان باسقارالاتىن پۋلەمەتتەن شابۋىل جاسالدى. ا ق ش اكىمشىلىگى يرانمەن يادرولىق كەلىسىمگە قايتا قوسىلۋعا نيەت بىلدىرگەندىكتەن، يزرايل بيلىگى شۇعىل ارەكەت ەتۋ كەرەك دەپ سانايدى. وسىلايشا، تاياۋ شىعىستاعى جاعداي ۋشىعىپ بارادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى