ءانشى مارات وماروۆ توي وتكىزگەن شىمكەنتتىك مەيرامحاناعا قاتىستى تەكسەرۋ شارالارى باستالدى

بۇل تۋرالى قالالىق پوليتسيا دەپارتامەنتىنىڭ باسپا ءسوز قىزمەتى مالىمەت تاراتتى، دەپ حابارلايدى قازاقپارات ءتىلشىسى.

پوليتسيانىڭ مالىمەتىنشە، مەيرامحانا قوجايىنىنا ايىپپۇل سالۋ ماسەلەلەرى قارالۋدا.

«اتالعان جايت بويىنشا 12.04.2021 -جىلى شىمكەنت قالاسى تاۋكە حان داڭعىلى بويىنداعى كەن بابا ساياباعىندا ورنالاسقان «كاراۆان» كافەسىنىڭ يەسىنەن تۇسىنىكتەمە الىنىپ، ءال-فارابي اۋدانى بويىنشا سانيتارلىق-ەپيدەميولوگيالىق باقىلاۋ باسقارماسىنا ءىس-قۇجاتتار جولداندى» دەلىنگەن حابارلامادا.

ايتا كەتەيىك، بۇعان دەيىن الەۋمەتتىك جەلىلەردە ءانشى مارات وماروۆتىڭ شىمكەنتتىك ءدامحانالاردىڭ بىرىندە وتباسىلىق توي وتكىزگەنى تۋرالى اقپارات تاراعان بولاتىن. تانىمال كومپوزيتوردىڭ قىزى ءزۇلفيا وماروۆانىڭ ۇزاتىلۋ تويىنىڭ كورىنىستەرىن قوناقتارى ۆيدەوعا ءتۇسىرىپ، جەلىگە جۇكتەپ جىبەرگەن بولاتىن. جۇلدىزدى اۋلەتتىڭ قۋانىشىندا سابينا التىنبەكوۆا مەن قايرات تۇنتەكوۆ بولعانى ايتىلۋدا.

اۆتور: اينۇر اقبايەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى