قازگيدرومەت: الداعى اپتادا كۇن بىردە كۇرت جىلىنىپ، بىردە كۇرت سۋىتادى

ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا «قازگيدرومەت» وكىلى ءساۋىردىڭ ورتاسىنان باستاپ كۇن بىردە كۇرت جىلىنىپ، بىردە كۇرت سۋىتاتىنىن ايتتى.

«الداعى اپتانىڭ سينوپتيكالىق بولجامدارىنا كەلەتىن بولساق، باتىس قازاقستان، اقتوبە، قوستاناي، سولتۇستىك قازاقستان، قاراعاندى، شىعىس قازاقستان، پاۆلودار وبلىستارىندا اۋا رايىنىڭ كۇندىزگى تەپەراتۋراسى 15+، 20+ گرادۋسقا، كەيبىر جەرلەردە 23+ گرادۋسقا دەيىن كوتەرىلىپ، تۇندە 3+، 5+ گرادۋس جىلى بولادى دەگەن بولجام بار. اتالعان جايت قاردىڭ ەرۋ پروتسەسىن ودان ءارى كۇشەيتىپ، مۇز قۇرساۋلارىن قوزعالتىپ، سۋ دەڭگەيىن كوتەرۋى مۇمكىن»، - دەيدى سينوپتيك.

بۇل جىلىمىق ءساۋىر ايىنىڭ قالعان كۇندەرىندە دە جالعاسقانىمەن، اراسىندا كۇننىڭ كۇرت سۋىتۋى دا مۇمكىن.

«ءساۋىر ايىنىڭ Ⅱ جانە Ⅲ توقسانىندا اتالعان ايماقتاردا اۋا تەمپەراتۋراسى جوعارىلاپ، كۇندىز 5+، 10+ گاردۋس ارالىعىندا، تۇندە +10 گرادۋسقا دەيىن كوتەرىلەدى دەپ بولجاپ وتىرمىز. ءبىراق ءساۋىردىڭ اۋا رايى قۇبىلمالى بولعاندىقتان، كەيبىر كۇندەرى كۇرت سۋىتۋىن كۇتىپ وتىرمىز. اتاپ ايتساق، كۇندىزگى تەمپەراتۋرا 3+، 8+ گرادۋسقا دەيىن تۇسسە، تۇندە 0،9- گاردۋس شاماسىندا بولجانادى»، - دەدى ديدار جانىبەك ۇلى.

ول، سونداي-اق كۇننىڭ بۇلايشا قۇبىلۋى تاسقىن قاۋپىن جيىلەتەتىنىن ەسكەرتتى.

«قايتالاپ ايتقىم كەلەدى. ەلىمىزدىڭ باسىم ايماقتارىندا قاردىڭ ەرۋىنەن سۋ باسۋ قاۋىپتەرىن ورىن الىپ جاتىر. الداعى تاۋلىكتەردە اۋا رايىنىڭ كۇرت جىلىنىپ، جاۋىن- شاشىننىڭ كوبەيۋىنەن ەلىمىزدىڭ باسىم ايماعىندا سۋ دەڭگەيى كوتەرىلەدى دەپ بولجامداپ وتىرمىز»، - دەدى مامان.

اۆتور: ەسىمجان ناقتىباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى