ق ر قارجىلىق مونيتورينگ اگەنتتىگى جانىنان قوعامدىق كەڭەس قۇرىلدى
ايتا كەتەيىك، قازاقستان رەسپۋبليكاسىنىڭ قارجىلىق مونيتورينگ اگەنتتىگى مەملەكەت باسشىسى قاسىم- جومارت توقايەۆتىڭ تاپسىرماسى بويىنشا كولەڭكەلى ەكونوميكاعا قارسى ءىس- قيمىلدىڭ تيىمدىلىگىن ارتتىرۋ ءۇشىن قۇرىلعان بولاتىن. قوعامدىق كەڭەس جاڭا مەملەكەتتىك ورگاننىڭ قىزمەتىنە قوعامدىق باقىلاۋدى جۇزەگە اسىرۋ ماقساتىندا قۇرىلدى.
2021 -جىلعى 1 - ساۋىردە وتكەن قوعامدىق كەڭەستىڭ وتىرىسىندا ونىڭ ءتوراعاسى ءسالىمباي شۇنەيەۆ سايلاندى. س. شۋنەيەۆتىڭ سالىق ينسپەكسياسى، پروكۋراتۋرا، قارجى پوليتسياسى ورگاندارىندا، سونداي- اق قاۋىپسىزدىك كەڭەسى مەن باس پروكۋراتۋرادا باسشىلىق لاۋازىمداردا جۇمىس تاجىريبەسى بار. قىزمەتتە بولۋدىڭ شەكتى جاسىنا جەتۋىنە بايلانىستى سىبايلاس جەمقورلىققا قارسى قىزمەتتەن بوساتىلعان.
سونىمەن قاتار، وتىرىس بارىسىندا اگەنتتىك قىزمەتىنىڭ باعىتتارى بويىنشا قۇرىلاتىن كوميسسيالاردىڭ سانى جانە قوعامدىق كەڭەس ءتورالقاسىنىڭ قۇرامى بەكىتىلدى، سونداي- اق كوميسسيالاردىڭ ءتوراعالارى سايلاندى. قازاقستان رەسپۋبليكاسى قارجىلىق مونيتورينگى اگەنتتىگىنىڭ قوعامدىق كەڭەسى ازاماتتىق قوعامنىڭ مۇددەلەرىن ءبىلدىرۋ جانە شەشىمدەر قابىلداۋ كەزىندە جۇرتشىلىقتىڭ پىكىرىن ەسكەرۋ، مەملەكەتتىك باسقارۋدى جەتىلدىرۋ جانە ورگان قىزمەتىنىڭ اشىقتىعىن قامتاماسىز ەتۋ ماقساتىندا قۇرىلعان كونسۋلتاتيۆتىك- كەڭەسشى، بايقاۋشى ورگان بولىپ تابىلادى.
ەستەرىڭىزگە سالا كەتەيىك، قوعامدىق كەڭەستەر مەملەكەت پەن ازاماتتىق قوعام اراسىنداعى ديالوگ نىسانى رەتىندە «100 ناقتى قادام» ۇلت جوسپارىن ىسكە اسىرۋ اياسىندا قۇرىلعان.
