الماتىداعى مۋزىكا مەكتەبىنىڭ وركەسترى باشقۇرتستاندا وتكەن حالىقارالىق كونكۋرستىڭ گران-ءپريىن يەلەندى

«الماتىداعى احمەت جۇبانوۆ اتىنداعى دارىندى بالالارعا ارنالعان رەسپۋبليكالىق قازاق مامانداندىرىلعان مۋزىكا مەكتەپ-ينتەرناتىنىڭ حالىق وركەسترى باشقۇرتستان رەسپۋبليكاسى مادەنيەت مينيسترلىگىنىڭ ۇيىمداستىرۋىمەن وتكەن «حالىق اسپاپتار وركەسترلەرى جانە انسامبلدەرى» حالىقارالىق ونلاين كونكۋرس-فەستيۆالىندە گران-ءپريدى جەڭىپ الدى. وركەستر جەتەكشىسى: بەكبولات ابدىبەرىك ۇلى»، دەلىنگەن حابارلامادا.

باشينفورم اگەنتتىگىنىڭ مالىمەتىنشە، حالىقارالىق «زوۆ ۋرالا» IV ۇلتتىق اسپاپتار مەن وركەسترلەر كونكۋرس-فەستيۆالى 29- جانە 31- ناۋرىز ارالىعىندا ۋفادا وتكەن. مۋزىكالىق بايقاۋ كوروناۆيرۋس ينفەكتسياسىنا بايلانىستى ونلاين فورماتتا وتكىزىلدى.

جارىسقا رەسەيدىڭ جانە قازاقستان، وزبەكستان، تۇركىيانىڭ شىعارماشىلىق توپتارى قاتىستى.

كونكۋرستىڭ گران-پري جۇلدەسىن ەكى ۇجىم يەلەندى، احمەت جۇبانوۆ اتىنداعى دارىندى بالالارعا ارنالعان رەسپۋبليكالىق قازاق مامانداندىرىلعان مۋزىكا مەكتەپ-ينتەرناتىنىڭ حالىق وركەسترى مەن ل. بەززۋبوۆ اتىنداعى تيۋمەن ورىس حالىق اسپاپتارى وركەسترى. سونداي-اق، بايقاۋدىڭ ەكى اتالىمىندا تاعى ەكى قازاقستاندىق ونەر ۇجىمى ءبىرىنشى ورىن يەلەندى.

ولار: اقتوبەلىك «امانات» فولكلور ءانسامبلى (جەتەكشىسى باقىتجان قۋاندىقوۆ) جانە «مۇراگەر» قازاق ۇلت اسپاپتار ءانسامبلى (جەتەكشىسى ايبەك سىزدىقوۆ).

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى