قازاقستاندا جالعا بەرىلەتىن جەر ۋچاسكەلەرىنىڭ شەكتى ولشەمى بەكىتىلەدى
بۇل تۋرالى ق ر اۋىل شارۋاشىلىعى مينيسترلىگى جەر رەفورماسى كوميسسياسىنىڭ وتىرىسىندا ەكونوميكالىق جۇمىس توبىنىڭ جەتەكشىسى اقىلبەك كۇرىشبايەۆ ايتتى، دەپ حابارلايدى قازاقپارات ءتىلشىسى.
«ەكونوميكالىق ماسەلەلەر بويىنشا جۇمىس توبىنىڭ وتىرىسىنا قازاقستاندىقتارعا جالعا بەرىلەتىن اۋىل شارۋاشىلىعى ماقساتىنداعى جەر ۋچاسكەلەرىنىڭ شەكتى ەڭ جوعارعى ولشەمىن بەكىتۋ تۋرالى ق ر ۇكىمەتىنىڭ قاۋلىسىن قابىلداۋ ماسەلەسى قارالدى. بۇل - وتە وزەكتى ماسەلە. بۇل ۇسىنىستى جۇمىس توبىنىڭ بارلىق مۇشەسى قولدادى»، - دەيدى ەكونوميكالىق جۇمىس توبىنىڭ باسشىسى اقىلبەك كۇرىشبايەۆ.
ونىڭ ايتۋىنشا، تاعى ءبىر ماسەلە - سىبايلاس جەمقورلىق تاۋەكەلدەرىن بولعىزباس ءۇشىن ساۋدا- ساتتىقسىز (كونكۋرسسىز، اۋكسيونسىز) جەر بەرۋ كەزىندە ينۆەستيتسيالىق جوبانى ايقىنداۋ ءتارتىبىن بەلگىلەۋ قاعيدالارىن قابىلداۋ.
«بۇل نورما ءتيىستى زاڭدا قارالىپ جاتىر. قازىرگى ۋاقىتتا كاسىپكەرلىك كودەكسىنە وزگەرىس ەنگىزىلۋدە. بۇل ماسەلەنى كۇن تارتىبىنەن الىپ، زاڭعا ەنگىزۋ كەرەك دەگەن ۇسىنىستى وتىرىسقا قاتىسقانداردىڭ ءبارى قولدادى»، - دەيدى ول.
اۆتور: زارينا قاھارمان
