اكادەميكتىڭ باتاسى
تابيعات جاڭارىپ، ەل يگى تىلەكپەن جازعىتۇرىمنىڭ ارايلى كۇندەرىنەن ۇمىتتەگەن شاقتا بيىل 94 جاسقا تولعان ادەبيەتتانۋ ابىزى، ۇلتتىق عىلىم اكادەمياسىنىڭ اكادەميگى، مەملەكەتتىك سىيلىقتىڭ لاۋرەاتى سەرىك قيرابايەۆ مەملەكەت باسشىسى قاسىم-جومارت توقايەۆتان ىستىق ىقىلاسقا تولى قۇتتىقتاۋ حات الدى.
مۇندا ەل پرەزيدەنتى 70 جىلدان استام عۇمىرىن ۇستاز دايارلاۋ مەن عىلىم، ادەبي سىن سالاسىنا ارناپ كەلە جاتقان سەرىك سمايىل ۇلىن تۋعان كۇنىمەن قۇتتىقتاي وتىرىپ، «حالقىمىز ءوزىڭىزدى كورنەكتى عالىم، بىلىكتى ۇستاز، ونەگەلى ومىرىمەن ءوز ورتاسىنا سىيلى، وسكەلەڭ ۇرپاققا ۇلگى بولا بىلگەن ارداقتى ازامات دەپ قۇرمەتتەيدى» دەي كەلە، اكادەميك ەڭبەكتەرىنىڭ ءبىلىم-عىلىم سالاسىنىڭ قازىناسى ەكەنىنە، شاكىرتتەرىنىڭ ۇستاز باستاعان يگى جولدى جالعاستىراتىنىنا سەنىم بىلدىرەدى.
وسى ورايدا قازىنالى قارت، ەل قادىرلەگەن اكادەميك سەرىك قيرابايەۆ:
«ءبىز، قۇدايعا شۇكىر، حالىقتىڭ ىنتا-نيەتى مەن ەل باسشىلارىنىڭ اعا بۋىنعا دەگەن زور قۇرمەتىنىڭ ارقاسىندا توقساننىڭ تورىنە شىقتىق. ۇزاق جىل اباي اتىنداعى قاز پ ي- دە، م. و. اۋەزوۆ اتىنداعى ادەبيەت جانە ونەر ينستيۋتىندا، ەلباسى يدەياسىن قولداپ، ەۋرازيا ۇلتتىق ۋنيۆەرسيتەتىندە ءدارىس بەرىپ، عىلىممەن شۇعىلداندىم. الدىمىزدان وقىعان جاستار حالىققا پايداسىن تيگىزىپ، ونەگەلى ۇستاز بولىپ جۇرگەنى - توككەن تەرىمىزدىڭ ناتيجەسى. ولارعا دا ريزاشىلىعىمدى بىلدىرەمىن. بەينەتتىڭ زەينەتىن كورىپ كەلەمىز. ەلباسى نۇرسۇلتان نازاربايەۆ ەلدى جۇمىلدىرىپ، ەلەۋلى بيىككە كوتەردى. وعان جاڭا استانا، تۇگەندەلگەن ءتورىمىز بەن شەگەندەلگەن شەكارامىز، حالىقتىڭ بەرەكە- بىرلىگى كۋا. ال، قاسىم-جومارت توقايەۆ ساباقتاستىق پەن ادىلەتتىك جولىمەن تۇڭعىش پرەزيدەنت قالىپتاستىرعان جاڭاشىل مەملەكەتتى جۇيەلى باسقارىپ كەلەدى. كۇندە تەلەديدار كورىپ، باسپا ءسوز وقىپ وتىرامىز. ەلدىڭ رۋحاني جاڭعىرىپ، تۇركىستاندى تۇلەتىپ، الەمدىك ءتۇرلى قيىندىقتارعا قاراماي، بيىك بەلەستەرگە ۇمتىلعانى كوڭىلىمدى توعايتادى. جاستارعا، بيلىكتىڭ جاڭا بۋىنىنا باتامدى بەرىپ وتىرامىن. ەل امان، جۇرت تىنىش، مەملەكەتىمىزدىڭ بارشا باستاماسى باياندى بولسىن!»، - دەيدى.
قازاق حالقىنىڭ: «باتالى ەر ارىماس، باتاسىز ەر جارىماس» دەگەن تاعىلىمدى ناقىلى بار. توقساننىڭ تورتىنە شىققان اكادەميك، جوعارى ءبىلىم مەن عىلىم قاياتكەرى سەرىك سمايىل ۇلىنىڭ جوعارىداعى باتاسى بارشا حالقىمىزعا جۇعىستى بولعاي.
ل. ن. گۋميلەۆ اتىنداعى ە ۇ ۋ پرورەكتورى، ق ر ۇ ع ا اكادەميگى ديحان قامزابەك ۇلى
