سەمەيدە اباي اتىنداعى جاڭا مەشىت اشىلدى
مەشىتتىڭ قۇرىلىسىن 2008 -جىلى شەتەلدىك ينۆەستورلار باستاعان بولاتىن. الايدا قارجىلىق قيىندىقتارعا بايلانىستى ولار جوبانى جالعاستىرۋدان باس تارتتى. سول كەزدەگى جوبانىڭ قۇنى ءتورت ميلليون دوللاردى قۇراعان. 2010 -جىلى 100 ميلليون تەڭگە بولگەن «قازاقمىس» كورپوراتسياسى مەشىت قۇرىلىسىن جالعاستىرۋدى ۇيعاردى.
ءبىراق كورپوراتسيا دا بۇل ءىستى سوڭىنا جەتكىزە الماعان. سەگىز جىل بويى سەمەيلىكتەر مەشىت قۇرىلىسىنا بەي- جاي قاراماي، جۇمىستىڭ جاندانۋىنا تىلەكشى بولدى. مەشىت جوباسى وسى ۋاقىتقا دەيىن بىرنەشە رەت وزگەرگەن. 2018 -جىلى قۇرىلىستى اياقتاۋعا كاسىپكەر دۋلات تاستەكەيەۆ كىرىستى. ءوز قاراجاتىمەن جۇمىستى قايتا جانداندىرعان كاسىپكەر باستالعان ءىستى سوڭىنا دەيىن جەتكىزگەن. ناتيجەسىندە بۇگىن قالاداعى ەڭ ۇلكەن ءدىني نىسان بوي كوتەرىپ، سالتاناتتى تۇردە اشىلدى.
«جاڭا ءتورت مۇنارالى مەشىتكە ۇلى اقىن اباي اتى بەرىلدى. سىيىمدىلىعى - 2500 ادام. التىن جالاتىلعان مۇنارالاردىڭ بيىكتىگى 37 مەتردى قۇرايدى. تۇركىستان اكىمدىگى ابايدىڭ 175 -جىلدىعىنا ارنالعان ءىس- شارالار اياسىندا ونىڭ اۋماعىن اباتتاندىرعان. ولار بۇل جوباعا 600 ميلليون تەڭگە ءبولدى. مەشىت عيماراتىنا ىرگەلەس 47 مىڭ شارشى مەتر اباتتاندىرىلىپ، ەكى جەرۇستى كوپىر سالىنىپ جاتىر. سونداي- اق 500 اۆتوكولىككە ارنالعان تۇراق قاراستىرىلىپ، 200 شام ورناتىلعان»، - دەپ حابارلادى سەمەي قالالىق اقپارات ورتالىعى.
اشىلۋ سالتاناتىنا ق ر باس ءمۇفتيى ناۋرىزباي قاجى تاعان ۇلى، ءدىن وكىلدەرى مەن قالا باسشىلىعى قاتىستى. قالا اكىمى نۇرىمبەت ساقتاعانوۆ قۇرىلىسقا اتسالىسقان بارلىق جانعا العىس ايتىپ، سەمەيلىكتەردى كوپتەن كۇتكەن مەشىتتىڭ اشىلۋىمەن قۇتتىقتادى. شاھار تۇرعىندارىن قۇتتىقتاۋعا اتاقتى اقىن مۇحتار شاحانوۆ پەن تەاتر جانە كينو رەجيسسەرى ءاسانالى ءاشىموۆ تە كەلدى.
«بۇگىنگى شارا ناۋرىز مەيرامىمەن تۇسپا- تۇس كەلىپ وتىر. سەمەيلىكتەر ءۇشىن بۇل ۇلكەن قۋانىش. مەشىت قۇرىلىسى ۇزاققا سوزىلىپ، ءبىراز ۋاقىتقا توقتاتىلدى. دۋلات تاستەكەيەۆتىڭ ارقاسىندا قۇرىلىس قايتا جاندانىپ، بۇگىن ونىڭ اشىلۋىن اتاپ وتۋدەمىز. بارشاڭىزدى ۇلىستىڭ ۇلى كۇنىمەن قۇتتىقتايمىن»، - دەدى ق ر باس ءمۇفتيى ناۋرىزباي قاجى تاعان ۇلى.
دۋلات تاستەكەيەۆتىڭ ايتۋىنشا، قۇرىلىستى وتكەن جىلدىڭ تامىز ايىندا ابايدىڭ 175 -جىلدىعىنا وراي اياقتاۋ جوسپارلانعان ەدى. ءبىراق كوروناۆيرۋس پاندەمياسىنا بايلانىستى جۇمىس كەشەۋىلدەگەن.
«مەشىت قۇرىلىسى ەكى جارىم جىل جۇرگىزىلدى. ءبىز قۇرىلىستى العاش باستاعان كەزدە ونى ەكى جىل ىشىندە اياقتاپ، 2020 -جىلدىڭ تامىزىندا، حاكىم مەرەيتويىنا وراي اشۋدى جوسپارلادىق. الايدا، الەمدىك پاندەميا جۇمىسقا اسەر ەتپەي قويمادى. سوندىقتان قۇرىلىس تاعى جارتى جىلعا سوزىلدى. سوعان قاراماستان، ءبىز باستالعان ءىستى سوڭىنا دەيىن جەتكىزە الدىق. كۇن مەن ءتۇن تەڭەلگەن قاسيەتتى كۇنى سىزدەرمەن بىرلەسىپ مەشىتتى سالتاناتتى تۇردە اشىپ جاتىرمىز. بۇل مەن ءۇشىن جانە بۇكىل سەمەي ءۇشىن ۇلكەن قۋانىش. ويتكەنى سەمەيلىكتەر بۇل مەشىتتىڭ اشىلۋىن ون جىلدان استام ۋاقىت كۇتتى. وسى جىلدار ىشىندە تالاي مەردىگەر وزگەردى. ال ءبىزدى مەشىتتىڭ تاعدىرى الاڭداتپاي قويمادى. سەمەيدىڭ دامۋىنا ءوز ۇلەسىمىزدى قوسقانىمىزعا وتە قۋانىشتىمىز»، - دەيدى دۋلات تاستەكەيەۆ.
