الماتىدا جازعى كافەلەردىڭ جۇمىس ىستەۋىنە رۇقسات بەرىلۋى مۇمكىن
بۇل تۋرالى ونلاين بريفينگ بارىسىندا قالالىق كاسىپكەرلىك جانە ينۆەستيسيالار باسقارماسىنىڭ باسشىسى ەركەبۇلان ورازالين ءمالىم ەتتى، دەپ حابارلايدى قازاقپارات ءتىلشىسى.
«قازىر ناعىز جۇمىس ىستەيتىن ۋاقىت. ءبىز جەرگىلىكتى اتقارۋشى ورگاندارعا بايلانىستى قانداي قولداۋ شارالارىن قابىلداي الاتىنىمىز تۋرالى تالقىلاۋدى بەلسەندى جۇرگىزىپ جاتىرمىز. بىلتىر الماتى اكىمى باقىتجان ساعىنتايەۆ قوعامدىق تاماقتانۋعا ۋاقىتشا قۇرىلىمداردى، ۇستەلدەردى، جازعى الاڭداردى قانداي دا ءبىر رۇقسات قۇجاتتارىنسىز قويۋ مۇمكىندىگىنە كەلىسىم بەردى. ءبىز بۇل ماسەلەنى قايتا قوزعادىق. قالا اكىمى قولدادى»، - دەيدى ەركەبۇلان ورازالين.
سونىمەن قاتار، ول دايىن ءونىمدى قوعامدىق تاماقتانۋ الدىندا شىعارۋ ماسەلەسىن قاراستىرىپ جاتقاندارىن ايتتى.
«مەن جاقىندا لوكداۋننان شىعامىز دەپ ۇمىتتەنەمىن جانە بۇل مۇمكىندىك جالپى تاماقتانۋ ورىندارىنا بەرىلەدى. سونداي- اق، دايىن ءونىمدى قوعامدىق تاماقتانۋ الدىندا شىعارۋ ماسەلەسىن قاراستىرىپ جاتىرمىز، بالكىم، مۇنداي مۇمكىندىكتى دە ۇسىناتىن شىعارمىز»، - دەيدى باسقارما باسشىسى.
ءوز كەزەگىندە، قازاقستان رەستوراتورلار كلۋبى قاۋىمداستىعىنىڭ پرەزيدەنتى گۇلنار كاتىبايەۆا بۇل يدەيانىڭ كاسىپكەرلەرگە ايتارلىقتاي قولداۋ بولاتىنىن جەتكىزدى.
«عيمارات ىشىندە كوپ ادامدى جيناۋ قاۋىپتى. مەيرامحانالارعا قالاي دا كومەكتەسۋ كەرەك. اكىم سىرتقا ۇستەل، ورىندىق قويۋعا رۇقسات بەردى. كاسىپكەرلەر مەيرام كۇندەرى جازعى ورىندار اشىلاتىنىن ويلاپ ازىق- تۇلىكتى كوپتەپ الىپ قويدى. ءتىپتى ناۋرىز كوجەگە قاجەتتى زاتتاردى دا الىپ قويعاندار بار. ال ولار تەز بۇزىلاتىن تاعام. شىعىن كوپ»، - دەدى ول.
اۆتور: الما مۇقانوۆا
