ناۋرىز: التى قۇرلىقتان قۇتتىقتاۋلار اعىلىپ جاتىر
فرانسيا، گەرمانيا، پولشا، سلوۆاكيا، موڭعوليا، تايلاند، اۆستراليا، ازەربايجان، يران ەلدەرىنەن تانىمال تۇلعالار مەن قاراپايىم تۇرعىندار جۇرەكجاردى تىلەكتەرىن جولداۋدا، دەپ حابارلايدى قازاقپارات.
سىرتقى ىستەر مينيسترلىگىنىڭ Telegram كانالىنا قازاقستان حالقىن ناۋرىز مەرەكەسىمەن قۇتتىقتاعان رەسمي تۇلعالار مەن شەتەلدىك ازاماتتاردىڭ لەبىزى تولاسسىز جاريالانىپ جاتىر. سولاردىڭ ىشىندە Deutsche Bank-تىڭ باسقارۋشى ديرەكتورى يورگ بونگارتتس تا بار.
«قۇرمەتتى قازاقستاندىقتار! Deutsche Bank اتىنان مەن سىزدەردى كوكتەمنىڭ شۋاقتى ناۋرىز مەرەكەسىمەن شىن جۇرەكتەن قۇتتىقتايمىن. ناۋرىز جاڭا جىلدىڭ باستالۋىن عانا ەمەس، تابيعاتتىڭ جاڭارۋىن دا بىلدىرەدى. ال قازاقستانداعى تابيعات ءوزىنىڭ اسەمدىگىمەن جانە الۋاندىعىمەن تاڭ قالدىرادى. ءبىز ءىرى حالىقارالىق بانك رەتىندە قازاقستاننىڭ ءتول تابيعاتىن ساقتاۋعا دەگەن ۇمتىلىسىن قولدايمىز جانە قازاقستان ۇكىمەتىمەن تەڭ دارەجەدە جاسىل ەنەرگيانى دامىتۋعا بەلسەندى قاتىسامىز. ءبىزدىڭ قازاقستاندىق «جاسىل» جوبالاردى قولداۋىمىز، جالپى نەمىس جانە ەۋروپالىق بيزنەسپەن قارىم- قاتىناس بۇكىل قازاقستان حالقىنا پايدالى بولادى دەپ ۇمىتتەنەمىز»، - دەيدى بانكير.
«پولشا- ازيا» ساۋدا- ونەركاسىپ پالاتاسىنىڭ پرەزيدەنتى يانۋش پەحوچينسكي بولسا، ءوزىنىڭ قۇتتىقتاۋىندا قازاقستان پولشا ءۇشىن ماڭىزدى ارىپتەس ەكەنىن جەتكىزدى.
«ناۋرىز - كوكتەم مەرەكەسى. ۇلكەن ءداستۇر مەن مادەنيەتتىڭ، دوستىقتىڭ وتباسىلىق مەرەكەسى. بيىل بۇل مەرەكە قازاقستان تاۋەلسىزدىگىنىڭ 30 جىلدىق مەرەيتويى قارساڭىندا تويلانىپ جاتىر. وسىنداي قىسقا مەرزىم ىشىندە ەكونوميكاسى ورنىقتى، ساياسي جۇيەسى بەرىك جانە ۇلكەن قۇرمەتكە يە زاماناۋي مەملەكەت قۇرا الدىڭىزدار. پولياك حالقى ءۇشىن، پولشا ەكونوميكاسى ءۇشىن قازاقستان ورتالىق ازياداعى ماڭىزدى ارىپتەس. ازيا - قىتاي - پولشا - ەۋروپالىق وداق كولىك دالىزىندەگى ماڭىزدى مەملەكەت دەپ بىلەمىز. بۇل ەكى اراداعى ىنتىماقتىڭ ۇلكەن الەۋەتى بار ەكەنىن كورسەتەدى. ەل باسشىلىعىنا جانە كاسىپكەرلەرگە ارىپتەستىك قاتىناستار ءۇشىن العىس ايتامىن. كوكتەم مەرەكەسىنە وراي سىزدەرگە پاندەميامەن كۇرەستە جەڭىس، ەل دامۋىندا تابىس تىلەيمىن»، - دەدى يانۋش پەحوچينسكي.
تايلاندتاعى Air Astana كومپانياسىنىڭ وكىلى دۋراچات پانياۆۋت تا قازاقستاندىقتاردى ۇلىس كۇنىمەن قۇتتىقتاي كەلىپ، تايلاندقا ءبىزدىڭ ەلدەن باراتىن تۋريستەردى كۇتەتىنىن ايتتى.
«ناۋرىز مەرەكەسىنە وراي بارلىق قازاقستاندىقتارعا تەك باقىت، بەرەكە، زور دەنساۋلىق تىلەيمىن! ءبىز قيىن كەزەڭدەردەن ءوتىپ، تاياۋ ۋاقىتتا تايلاندتا قازاقستاندىق تۋريستەردى قارسى الىپ، قاۋىشامىز دەپ ۇمىتتەنەمىز»، - دەدى ۋراچات پانياۆۋت.
اۆستراليانىڭ فورتستريت مەكتەبىنىڭ وقۋشىلارى دا قازاق حالقىن ناۋرىز مەرەكەسىمەن قۇتتىقتادى.
«ناۋرىز مەرەكەسى قۇتتى بولسىن! ءبىز سىزدەرگە باقىت، وركەندەۋ، اماندىق تىلەيمىز. اۆستراليالىقتاردىڭ ىزگى تىلەگى قابىل الىڭىزدار»، - دەيدى وقۋشىلار.
يۋنەسكو-نىڭ ماتەريالدىق ەمەس مادەني مۇراسىن قورعاۋ جونىندەگى كونۆەنتسيانىڭ حاتشىسى تيم كەرتيس تە قازاقستاندىقتارعا يگى تىلەگىن ارناپ، ناۋرىز مەيرامى الەم حالىقتارىنا ورتاق مۇرا ەكەنىن اتاپ ءوتتى.
«ناۋرىز يۋنەسكو كولەمىندە حالىقارالىق كۇن رەتىندە مويىندالعان جانە ادامزاتتىڭ ماتەريالدىق ەمەس مادەني مۇرالارىنىڭ تىزىمىندەگى ماڭىزدى ەلەمەنت بولىپ سانالادى. وسىعان بايلانىستى ناۋرىز قۇتتى بولسىن دەگىم كەلەدى»، - دەيدى يۋنەسكو وكىلى.
قۇتتىقتاۋشىلار اراسىندا وسىدان 10 جىل بۇرىن موڭعولياعا قونىس اۋدارىپ، سونداعى قازاقتاردان ۇلتىمىزدىڭ ءداستۇرى مەن ءتىلىن مەڭگەرگەن پورتەلدەر وتباسى دا بار.
«ءبىز بايان-ولگي ايماعىندا 10 جىل ءومىر سۇردىك، قازاق ءتىلىن مەڭگەردىك. قازاق تىلىندە سويلەۋ وتە كوركەم»، - دەيدى سارا پورتەلل.
«قازاقستان حالقىن كوكتەمنىڭ نۇرلى مەرەكەسى ءاز ناۋرىزبەن شىن جۇرەكتەن قۇتتىقتايمىز! ناۋرىز ءار قازاقتىڭ شاڭىراعىنا شاتتىق پەن قۋانىش اكەلسىن. ۇلىس وڭ بولسىن، اق مول بولسىن!»، - دەدى كرەيگ پورتەلل.
ەسكە سالساق، الەمنىڭ ءار تۇكپىرىنەن جولدانعان قۇتتىقتاۋلار كەشەدەن بەرى كەلىپ جاتىر. ىزگى نيەت بىلدىرۋشىلەردىڭ اراسىندا الەمگە اتى ايگىلى ديزاينەرلەر، بولليۆۋد اكتەرلەرى مەن ساياساتكەرلەر دە بار.
اۆتور: ەسىمجان ناقتىباي
