جامبىل وبلىسىندا «اجەلەر القاسى» قۇرىلدى
ماقساتى - ايەلدەر مەن جاس قىزدارعا، كەلىندەرگە حالىقتىق سالت- داستۇرلەر مەن ادەت- عۇرىپتىڭ ماڭىزدىلىعىن ءتۇسىندىرىپ، ولاردى ۇستانۋ، باقىتتى وتباسى قۇرۋدىڭ قۇپيالارىمەن ءبولىسۋ، دەپ حابارلايدى قازاقپارات.
بۇل كەڭەس اجەلەر مەكتەبىنىڭ نەگىزىندە قۇرىلدى. بۇگىندە ولار جاس ۇرپاقتى تاربيەلەۋ ىسىندە قوعامدىق ينستيتۋتتارمەن ىنتىماقتاسۋعا دايىن. وسىعان ايرىقشا كوڭىل بولگەن ايماق باسشىسى ادەت- عۇرىپتارىمىزدى قايتا جاڭعىرتىپ، ۇلتتىق ءداستۇرىمىزدى دارىپتەۋدە اجەلەر القاسىنىڭ ءرولى زور ەكەنىن اتاپ ءوتتى. ويتكەنى، اجەلەر - حالىق دانالىعىنىڭ سارقىلماس قاينار كوزى، وسكەلەڭ ۇرپاقتىڭ تاربيەشىسى.
«قازىرگى تاڭدا تاستاندى بالالار، جاستاردىڭ اجىراسۋى كوبەيىپ كەتتى. وسىنداي كەلەڭسىزدىكتەرگە توسقاۋىل قويۋ ءۇشىن اجەلەرىمىز جاس بۋىن- وسكەلەڭ ۇرپاقتى تاربيەلەپ، ءاردايىم اقىل- كەڭەستەرىن ايتىپ وتىرسا، تاربيەلى جاستار، يبالى قىزدارىمىز كوبەيىپ، وتباسى ينستيتۋتىن نىعايتۋعا زور اسەر ەتەتىنى ءسوزسىز. سىزدەرگە العىسىمىز شەكسىز. سىزدەر سياقتى انالاردى كورگەن كەزدە ەرەكشە قۋانامىن»، - دەدى ايماق باسشىسى «اجەلەر القاسىنىڭ» مۇشەلەرىمەن كەزدەسۋدە بەردىبەك ساپاربايەۆ.
قازاقستان مۇسىلماندارى ءدىني باسقارماسىنىڭ «ايەل- قىزدار» سەكتورىنىڭ جامبىل وبلىسىنداعى جەتەكشىسى گۇلجان سەرىك قىزى وبلىستىڭ بارلىق قالا جانە اۋداندارىندا اجەلەر القاسى قۇرىلعانىن حابارلادى. قازىرگى تاڭدا القا قۇرامىندا 76 اجە بار دەسەك، بۇگىنگە دەيىن ولارمەن 7 كەزدەسۋ، 11 ءىس-شارا وتكىزىلگەن. شارا سوڭىندا بەردىبەك ساپاربايەۆ قاتىسۋشىلاردى كەلە جاتقان مەرەكەمەن قۇتتىقتاپ، اجەلەرگە ەستەلىك سىيلىقتار تابىس ەتتى.
اۆتور: سايا سەمباي
