وليمپيادا ۇيىمداستىرۋشىسى ورىنسىز ءازىلى ءۇشىن جۇمىستان كەتتى
ول 33 جاستاعى بوديپوزيتيۆ باعىتىن ۇستاناتىن ءارتىس ناومي ۆاتانابەگە ويىننىڭ اشىلۋ سالتاناتىندا دوڭىز كوستيۋمىن كيىپ، اسپاننان ءتۇسۋ تۋرالى ۇسىنىس جاساعان.
بۇل قويىلىمعا ساساكي Olympig («pig» اعىلشىن تىلىنەن اۋدارعاندا «دوڭىز» دەگەندى بىلدىرەدى) اتاۋىن بەرگەن كورىنەدى. بۇل يدەيانى وزگەلەر ورىنسىز ءارى ايەلدەردى قورلاۋ دەپ تاۋىپ، 66 جاستاعى ۇيىمداستىرۋشى ءوز ءازىلى ءۇشىن كەشىرىم سۇراۋعا ءماجبۇر بولعان. ءىزىن الا ساساكي جۇمىسىنان كەتتى.
وسىدان بىرنەشە ۋاقىت بۇرىن، توكيو ويىندارى ۇيىمداستىرۋ كوميتەتىنىڭ باسشىسى ەسيرو موري دە ايتقان سەكسيستىك پىكىرلەرى ءۇشىن قىزمەتىنەن كەتۋگە ءماجبۇر بولعان ەدى. ول ءوز سوزىندە كوپ ايەل قاتىسقان قىزمەتتىك كەزدەسۋلەردىڭ ۇزاققا سوزىلاتىنىن ايتقان. 83 جاستاعى ساياساتكەردىڭ سوزىنە سەنسەك، ايەلدەر كوپ سويلەيدى جانە ءار ايەل ءوز پىكىرىن ايتىپ قالۋعا تىرىسادى ەكەن. موري ءوزىنىڭ پىكىرى ءۇشىن كەشىرىم سۇراعانىمەن، ونىڭ بۇل ارەكەتى قىزمەتىن ساقتاپ قالا الماعان بولاتىن.
ناۋرىز ايىنىڭ باسىندا توكيو وليمپياداسىنىڭ ۇيىمداستىرۋشىلارى ويىنعا شەتەلدىك جانكۇيەرلەردىڭ قاتىسۋىنا تيىم سالۋ تۋرالى شەشىم قابىلداعان ەدى. ۇيىمداستىرۋشىلار بۇل شەشىمدى جاپونيادا كوروناۆيرۋس ىندەتى تارالۋىنىڭ الدىن الۋ ماقساتىندا شىعاردى. الايدا، كەي دەرەكتەرگە سۇيەنسەك، وسى ماسەلە تۋراسىنداعى سوڭعى ءارى ناقتى شەشىم الداعى ايدىڭ ىشىندە شىعادى.
ەستەرىڭىزگە سالا كەتەيىك، توكيو وليمپياداسى 2021-جىلدىڭ 23- شىلدەسى مەن 8- تامىز ارالىعىندا وتەدى دەپ جوسپارلانۋدا.
