استانادا پوليتسەيلەر مەن مۇعالىمدەردى كوروناۆيرۋسقا قارسى ۆاكسينالاۋ جالعاسۋدا - ۆيدەو
قالا اكىمدىگىنەن ءمالىم ەتكەندەي، پوليتسەيلەر اراسىندا ۆاكسينا الدىمەن، تۇرعىندارمەن تىعىز بايلانىستا بولاتىن، ۆيرۋس جۇقتىرۋ قاۋپى جوعارى قىزمەتكەرلەرگە سالىنادى.
ولاردىڭ اراسىندا ۋچاسكەلىك پوليتسيا ينسپەكتورلارى، پوترۋلدىك پوليتسەيلەر، يۋۆەنالدىق پوليتسيا جانە وزگە دە ماماندار بار. ۆاكسيناتسيا جاسالماس بۇرىن دارىگەر مىندەتتى تۇردە دەنە تەمپەراتۋراسىن، جۇرەك قاعىسىن، ارتەريالىق قان قىسىمىن، تىنىس الۋىن جانە جۇرەك-قان تامىرلارى جۇيەسىن، اۋىز قۋىسىن تەكسەرەدى، ەپيدەميولوگيالىق انامنەز ناقتىلانادى. ۆاكسيناتسياعا تەك ەكپەگە قارسى كورسەتىلىمى جوق قىزمەتكەرلەر كىرگىزىلدى. پوترۋلدى پوليتسيا قىزمەتىنىڭ ينسپەكتورى ايبەك قۇرامىسوۆ ۆاكسينا العاننان كەيىن ءوزىن قالاي سەزىنەتىنىن ايتىپ بەردى. «مەديتسينالىق تەكسەرىستەن كەيىن ۆاكسينانىڭ ءبىرىنشى كومپونەنتىن الدىم. ءوزىمدى قالىپتى سەزىنىپ تۇرمىن، جۇمىس ورنىندامىن. ۆاكسيناتسيانىڭ ۆيرۋسپەن كۇرەستە كومەگى تيەتىنىنە سەنىمدىمىن. پاندەميا باستالعاننان بەرى پوليتسيا قىزمەتكەرلەرى ءتۇرلى جاعدايمەن ۇشىراسىپ، ۆيرۋس جۇقتىرۋ ءقاۋپى جوعارى ايماقتاردا الدىڭعى شەپتە ءجۇر عوي»، - دەدى پوليتسيا اعا لەيتەنانتى.
ايتا كەتسەك، ۆاكسيناتسيا نۇر-سۇلتان قالاسى پوليتسيا دەپارتامەنتىنىڭ ەمحاناسىندا ءوتتى.
№85-مەكتەپ- ليتسەيىنىڭ باستاۋىش سىنىپ ءمۇعالىمى اينۇر جانسەرىكوۆا ۆاكسينانى ەڭ ءبىرىنشى كەزەكتە ءوزىنىڭ وقۋشىلارىنىڭ قاۋىپسىزدىگى ءۇشىن قابىلداعانىن جەتكىزدى.
«بىزگە ناقتى نۇسقاما بەرىلدى جانە الداعى 3 كۇندە بولۋى مۇمكىن سيمپتومدار تۋرالى ءتۇسىندىردى. قىسقا- نۇسقا، ءبارى تۇسىنىكتى جازىلعان. ءبىز ەلىمىزدىڭ ازاماتى جانە پاتريوتتارى رەتىندە ەكپە الۋ ءۇشىن كەلدىك. قانشاما وقۋشىمەن بايلانىستا بولامىز. سوندىقتان ولاردىڭ، ءوزىمىزدىڭ جانە جاقىندارىمىزدىڭ قاۋىپسىزدىگى ءۇشىن ۆاكسينا سالدىراتىن بولدىق. ءبىزدى ەشكىم كۇشتەپ، ماجبۇرلەپ جاتقان جوق. ەكپە سالدىرۋعا تاعى 7 ارىپتەسىم بىرگە كەلدى»، - دەدى اينۇر جانسەرىكوۆا.
ەكپە سالىناتىن ادامعا پروتسەدۋرا وتكىزۋ الگوريتمى كورسەتىلگەن «پاتسيەنتتەر مارشرۋتى» بەرىلەدى.
«الدىن الا جاسالعان ءتىزىم بويىنشا ازاماتتاردى ەكپە سالۋعا شاقىرامىز. جالپى تەكسەرۋدەن وتەدى، قاجەتتى مالىمەتتەر بەرىلەدى. ودان كەيىن پاتسيەنتتىڭ كەلىسىمى الىنىپ، ەكپە سالىنادى. ەكپەدەن سوڭ 30 مينۋت ءبىزدىڭ باقىلاۋىمىزدا بولادى. ەگەر ەشقانداي اللەرگيالىق رەاكسيا بايقالماسا ۇيىنە جىبەرەمىز»، - دەدى «شيپاگەر» ەمحاناسىنىڭ جالپى تاجىريبە دارىگەرى ساندۋعاش زۇلپۇحاروۆا. دارىگەردىڭ ايتۋىنشا، 18 جاسقا دەيىنگى بالالارعا، جۇكتى ايەلدەرگە، ج ر ۆ ي سيمپتومدارى بار، سونىمەن قاتار سوڭعى 6 ايدا كوروناۆيرۋسپەن اۋىرعان ازاماتتارعا ەكپە سالىنبايدى. ەكپە جاسالعاننان كەيىن 3 كۇن بويى مونشاعا بارۋعا، ياعني ەكپە ورنىن سۋلاۋعا بولمايدى. سپيرتتىك ىشىمدىك ىشۋگە جانە اۋىر جۇمىس ىستەۋگە دە تىيىم سالىنعان. ەستەرىڭىزگە سالساق، قازاقستاندا ۆاكسيناتسيا كەزەڭ- كەزەڭىمەن جۇرگىزىلۋدە.
ءبىرىنشى كەزەڭدە، كوروناۆيرۋس ينفەكسياسىنا قارسى ۆاكسينانى ينفەكسيالىق اۋرۋحانالاردىڭ دارىگەرلەرى، جەدەل مەديتسينالىق جاردەم ستانتسيالارىنىڭ، جانساقتاۋ بولىمدەرىنىڭ، اۋرۋحانالاردىڭ قابىلداۋ بولىمدەرىنىڭ، سانەپيدقىزمەت جانە باسقا دا بولىمدەردىڭ ماماندارى قابىلدادى.
1-ناۋرىزدان باستاپ ۆاكسيناتسيانىڭ ەكىنشى كەزەڭىندە پوليتسەيلەر مەن مۇعالىمدەرگە جانە مەديتسينالىق ۇيىمداردىڭ باسقا دا بولىمدەرىنىڭ قىزمەتكەرلەرىنە ەكپە سالىنۋدا. ال ۆاكسيناتسيانىڭ ءۇشىنشى كەزەڭىندە سوزىلمالى اۋرۋلارى بار جانە باسقا دا ساناتتاعى ازاماتتار قامتىلادى. جىل سوڭىنا دەيىن قازاقستاندا ۆاكسينا قابىلداعان ازاماتتار سانىن 6 ميلليونعا جەتكىزۋ كوزدەلىپ وتىر.
