الماتىدا تۇڭعىش رەت «تاڭجارىق» ادەبي سىيلىعى تابىس ەتىلدى

اتالعان شارا حالىقارالىق «تاڭجارىق زەرتتەۋ» قور قوعامىنىڭ ۇيىمداستىرۋىمەن، «وتانداس- ەل» رەسپۋبليكالىق قوعامدىق بىرلەستىگىنىڭ قولداۋىمەن وتكەن. سونداي-اق، بۇل جولى تۇڭعىش رەت «تاڭجارىق» ادەبي سىيلىعى تابىس ەتىلگەن. ونەرپازداردىڭ قاتىسۋىمەن كونسەرتتىك باعدارلامادا تاڭجارىق اقىننىڭ اندەرى شىرقالىپ، وعان ارناپ شىعارىلعان كۇيلەر تارتىلدى.

مادەني كەشتە «تاڭجارىق» اتتى ادەبي جۋرنالدىڭ تۇساۋى كەسىلدى. ادەبي جۋرنالدىڭ باستى ماقساتى - پروزاعا، پوەزياعا قالام تەربەپ جۇرگەن جاس جازۋشىلار مەن اقىنداردىڭ ءورىسىن اشۋ. ولارعا ءوز شىعارماشىلىعىن تانىتۋعا مۇمكىندىك جاساۋ. شەتەلدەن كەلگەن قانداس اعايىنداردىڭ اراسىنداعى قالامگەرلەردى، ادەبيەت سالاسىنىڭ وكىلدەرىن، ولاردىڭ شىعارماشىلىعىن اتاجۇرتتاعى اعايىندارعا تانىستىرۋ، تاڭجارىق مۇرالارىن كەڭىنەن ناسيحاتتاۋ.

«تاڭجارىق اقىننىڭ ءومىر سۇرگەن ءداۋىرى بىزگە ءارى جاقىن، ءارى الىس دەۋگە بولادى. جاقىن بولاتىنى ول تاريح قويناۋىنا كۇنى كەشە عانا جىلجىعان ⅩⅩ عاسىردا ءومىر ءسۇردى. الىس بولاتىنى وزگە جۇرتتا، بولەك قوعامدا جاسادى. تاعدىر ونىڭ ماڭدايىنا بۇرالاڭى كوپ كۇرەس پەن ازاپقا تولى وزگەشە ءومىر سىيلادى»، دەپ جازادى مادەني شاراعا بايلانىستى باسپا ءسوز مالىمدەمەدە.

ايتا كەتەيىك، اقىن، جىراۋ، اعارتۋشى، كومپوزيتور جولدى ۇلى تاڭجارىق 1903 -جىلى 15-ناۋرىزدا، قىتاي قازىرگى ىلە-قازاق اۆتونوميالىق وبلىسى، كۇنەس اۋدانى، قامىستى اۋىلىندا تۋعان. 1916 -جىلى ورىس جەرىنەن قۋعىندالىپ كەلگەن ءابدىلماجيت اتتى تاتار وقىمىستىسىنان ءبىلىم الىپ، كەيىن شاپقى (1918)، كۇرە مەكتەپتەرىندە (1919)، قازاقستاننىڭ كەگەن، نارىنقول اۋداندارىندا جەتى جىلدىق مەكتەپتە وقىعان (1922-1925). ت. جولدى ۇلى 30-شى جىلدارى شىڭجاڭدا مۇعالىم، جاڭادان اشىلعان «ىلە» گازەتىنىڭ تۇڭعىش رەداكتورى (1936) بولعان. جاسىنان ولەڭ جازىپ، ايتىسقا قاتىسقان.

اۆتور: بەيسەن سۇلتان ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى