قورداي قاقتىعىسى: ءبىر جىلدا نە وزگەردى؟
كەيبىر جوبالار مەن بىتپەگەن جۇمىستار ءالى دە جالعاسىپ جاتىر. اۋداندا ءبىر جىلدا نە وزگەردى؟ جەرگىلىكتى جۇرتتىڭ قازىرگى تۇرمىس- تىرشىلىگى قالاي؟
رۋسلان باقىتبەك ۇلى، ءتىلشى:
- قوردايداعى جاعا ۇستاتقان قاقتىعىسقا تۋرا ءبىر جىل بولدى. جەرگىلىكتى تۇرعىندار اراسىندا تۋىنداعان جانجال جاپپاي تارتىپسىزدىككە ۇلاسقان ەدى. سالدارىنان 11 ادام قازا تاۋىپ، ونداعان تۇرعىن ءۇي مەن كاسىپكەرلىك نىساندارى قيراپ، ورنەتىپ كەتتى. زەرتتەپ، زەردەلەي كەلە، بۇعان تالاي ماسەلەنىڭ تۇرتكى بولعانى انىقتالدى. سول ۋاقىتتا ەل پرەزيدەنتى جۇمىس ساپارىمەن ارنايى كەلىپ، ايماقتىڭ ءوسىپ- وركەندەۋىن تەجەيتىن كەدەرگىلەردى جويىپ، حالىقتىڭ ءال- اۋقاتىن ارتتىراتىن شارالاردى قابىلداۋ جونىندە ناقتى تاپسىرمالار بەرگەن بولاتىن. مەملەكەت باسشىسىنىڭ تاپسىرماسى قازىر ىسكە اسقان.
توتەنشە جاعداي كەزىندە بۇلىنگەن 65 نىسان بولسا، ونىڭ 46-ى تۇرعىن ۇيلەر ەدى. قازىر قيراعان نىسانداردىڭ ءىزى دە قالماعان. كەتكەن كەمشىلىكتەر تۇزەلىپ، ءبىر جىلدا قالىپقا كەلتىرىلدى. اۋدانعا مەملەكەتتەن تاريحتا بولماعان قاراجات ءبولىندى. 35,1 ميلليارد تەڭگەگە الەۋمەتتىك ماڭىزى زور 400-گە جۋىق جوبا جۇزەگە اسىرىلدى.
رۇستەم داۋلەت، قورداي اۋدانىنىڭ اكىمى:
- بىلتىر 6 كوپ قاباتتى تۇرعىن ءۇيدىڭ قۇرىلىسى باستالدى. ونىڭ تورتەۋى وسى قورداي اۋىلىندا. سوسىن مىنا گۆاردەيسكىدە. نەگىزىنەن مىنا 3 ءۇي بەرىلدى. قالعان ۇيلەر وتپەلى. بيىلعى جىلى تاعى دا 8 ۇيگە قاراجات ءبولىنىپ جاتىر. ونىڭ التاۋى وسى قورداي اۋدانىنىڭ ورتالىعىندا. سونداي- اق ءۇش جاڭا مەكتەپتىڭ قۇرىلىسى قولعا الىنىپ، اپاتتى جاعدايداعى ءبىلىم وشاقتارىنىڭ ماسەلەسى شەشىلدى. ودان بولەك، 6 اۋىلعا اۋىز سۋ جۇيەسى جۇرگىزىلدى. 7 ينجەنەرلىك ينفراقۇرىلىم، 4 سپورتتىق- ساۋىقتىرۋ كەشەنى سالىندى. اۋداندا جاڭادان 7,4 شاقىرىم جول سالىنىپ، 343 شاقىرىم جول ورتا جوندەۋدەن ءوتتى. 9 اۋىل 100 پايىز اسفالتتالدى. بۇل ىستەلگەن جۇمىستىڭ ءبىر بولىگى عانا.
سۇگىرباي تولە، قورداي اۋدانىنىڭ تۇرعىنى:
- حالىق ريزا بولىپ جاتىر. 29 جىلدا ەرەكشە جىل بولدى. بۇرىن سوڭدى مۇنداي قاراجات مەملەكەت تاراپىنان بولىنگەن ەمەس. پرەزيدەنتىمىز قاسىم- جومارت كەمەل ۇلى ءوزى كەلىپ، كورىپ حالىقتىڭ جاعدايىمەن تانىسىپ، ۇلكەن قامقورلىق جاسايمىن دەپ ۋادە بەرىپ كەتكەن. مىنە، سول ۋادەسىندە تۇردى.
جۇزەگە اسقان ءىرى جوبانىڭ ءبىرى اۋداندى گازداندىرۋ بولدى. 248 شاقىرىم ماگيسترالدى قۇبىر تارتىلىپ، بىلتىر 22 ەلدى مەكەن گاز كىردى. وسىنىڭ ارقاسىندا قوردايلىقتاردىڭ % 95- ءى گازبەن قامتىلدى. قازىر اۋىلدىق اعايىن كوگىلدىر وتىننىڭ راحاتىن كورىپ وتىر.
ءجاميعا مولداجانوۆا، قورداي اۋدانىنىڭ تۇرعىنى:
- وسى اۋىلعا كەلىن بولىپ تۇسكەنىمە 40 جىل بولدى. 40 جىلدا كوپتەن كۇتكەن تابيعي گازىمىز كەلدى. گاز ەندى كومىرگە قاراعاندا ىڭعايلى عوي. جىلىنا ءبىر ون شاقتى توننا كومىر جاعامىز. كەمىندە 150 مىڭ اقشا كەتەتىن. ەندى مىنا گاز جانىپ سوعان قۋانىپ جاتىرمىز.
ۇلتارالىق تاتۋلىقتى نىعايتۋ باعىتىنداعى جۇمىستار كۇشەيتىلىپ، يدەولوگياعا باسىمدىق بەرىلدى. 30-عا جۋىق ەتنوس وكىلدەرى تۇراتىن اۋداندا ءدىني تۇراقتىلىقتى ساقتاۋ ءۇشىن تۇڭعىش رەت يمامدار ءۇيى اشىلدى. سونداي- اق مەملەكەتتىك ءتىلدىڭ قولدانۋ اياسىن كەڭەيتۋ شارالارى جانداندى. 2020 -جىلى مىڭنان استام ادام قازاق ءتىلى وقۋ كۋرستارىنان ءوتتى. ونىڭ % 99- ءى وزگە ۇلت وكىلدەرى. ءقازىر ماسانشى، اۋحاتتى، سورتوبە، قاراسۋ اۋىلدىق وكرۋگتەرىنىڭ مەكتەپتەرىندەگى 61 سىنىپتىڭ 41- ءى قازاق تىلىندە وقىتىلىپ جاتىر.
ابدىبەك سەيىلحانوۆ، «قوعامدىق كەلىسىم» كەڭەسىنىڭ ءتوراعاسى:
- مەملەكەتتىك ءتىلدى دامىتۋ. ۇلتارالىق قارىم- قاتىناستى جاقسارتۋ، سونىمەن بىرگە جاس بۋىنداردى تاربيەلەۋگە ۇلتتىق سالت- داستۇرلەردى ۇيرەتۋ ماسەلەلەرى قولعا الىندى. قازىر وسى كەزەڭدە ءبىزدىڭ اۋداندا بۇرىنعىداي ۇلتارالىق تۇسىنىسپەۋشىلىك دەگەن جوق. بۇكىل حالقىمىزدىڭ ءبارى ءبىرىن ءبىرى ءتۇسىنىپ، تاتۋ- ءتاتتى ءومىر كەشىپ جاتىر. ەڭ باستىسى، الەۋمەتتىك- ەكونوميكالىق سەرپىلىستەن كەيىن جۇرتتىڭ ەڭسەسى كوتەرىلىپ قالدى. جەرگىلىكتى تۇرعىندارعا اقپاندا بولعان جاعداي ساباق بولدى. جۇرت قازىر تۇرمىس- تىرشىلىگىن تۇزەتىپ ەڭبەكتەنىپ جاتىر.
www.24.kz
