قازاقستاندىقتاردىڭ زەينەتاقى جيناعى ينفلياتسياعا «جەلىنىپ» كەتپەي مە

تىلشىلەردىڭ بۇل سۇراعىنا ورتالىق كوممۋنيكاتسيالار الاڭىندا وتكەن باسپا ءسوز ءماسليحاتىندا «ءبىرىڭعاي جيناقتاۋشى زەينەتاقى قورى» ا ق باسقارما ءبوراعاسى جانات قۇرمانوۆ جاۋاپ بەردى، دەپ حابارلايدى قازاقپارات ءتىلشىسى.

«بۇل شىنىندا دا، زەينەتاقى جۇيەسىندەگى وزەكتى ماسەلەلەردىڭ ءبىرى. زاڭعا سايكەس، سەنىمدى باسقارۋشىلاردىڭ ءبىرى - ۇلتتىق بانك ەكەنىن ەسكە سالا كەتەيىن. كۇشىنە ەنىپ جاتقان جاڭا نورمالارعا سايكەس، باسقارۋدىڭ باسەكەلى نارىعىن قالىپتاستىرۋ ءۇشىن زەينەتاقى جيناعىن باسقارۋشى كومپانيالارعا اۋدارۋ مۇمكىندىگى بەرىلىپ جاتىر. ۇلتتىق بانكتىڭ باسقارۋى تۋرالى ايتار بولساق، بۇل باعىتتا شۇعىل جانە كوپدەڭگەيلى شەشىمدەر قابىلدانۋدا. ينۆەستيتسيالاۋ بويىنشا نەگىزگى باعىت- باعداردى ۇلتتىق قوردى باسقارۋ كەڭەسى بەلگىلەيدى. ودان بولەك ۇكىمەت قاۋلىسىنا سايكەس، زەينەتاقى جيناعىن ينۆەستيتسيا رەتىندە پايدالانۋعا بولاتىن قارجى قۇرالدارىنىڭ ءتىزىمى جاساقتالادى. بۇل - ۇكىمەتتىڭ قۇزىرىنداعى ءىس. وسىدان كەيىن ۇلتتىق بانك ينۆەستيتسيالىق دەكلاراتسيانى قابىلدايدى»، - دەدى جانات قۇرمانوۆ.

ونىڭ ايتۋىنشا ەل ىشىندە سالۋعا بولاتىن ينۆەستيتسيا كوزدەرى از بولعاندىقتان، زەينەتاقى جيناعىنىڭ ءبىر بولىگى (ۇشتەن ءبىرى) شەتەلدىك نارىقتارعا سالىنعان.

«ينۆەستيتسيالاۋدىڭ ساپاسىن ساقتاپ تۇرۋ ءۇشىن وسىنداي شەشىم قابىلدانعان. ەكىنشىدەن، شەتەلگە سالىناتىن ينۆەستيتسيا «قاتتى» ۆاليۋتامەن سالىناتىندىقتان، بۇل جيناق تەڭگەنىڭ قۇنسىزدانۋىنان تاۋەلسىز. ينۆەستيتسيالاۋدا قولدانىلاتىن نەگىزگى ۆاليۋتا – ا ق ش دوللارى»، - دەدى ول. ول سونىمەن قاتار قازاقستاندىقتاردىڭ زەينەتاقى جيناعىنىڭ 40 پايىزى قازاقستاننىڭ ءوز ىشىندەگى مەملەكەتتىك قۇندى قاعازدارعا ينۆەستيتسيالاناتىنىن ايتىپ ءوتتى. «بۇل دا حالىقارالىق تاجىريبە»، - دەيدى ول.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى