سكرينينگتىك زەرتتەۋلەر قاۋىپتى دەرتتى ەرتە انىقتاۋعا مۇمكىندىك بەرەدى - دارىگەر
بۇل تۋرالى قازاقپارات تىلشىسىنە كارديولوگيا جانە ىشكى اۋرۋلار عىلىمي- زەرتتەۋ ينستيتۋتىنىڭ تەراپيەۆت دارىگەرى راۋشان قابىكەنوۆا ايتىپ بەردى.
ونىڭ ايتۋىشا، اۋرۋلاردى ەرتە ساتىسىندا انىقتاۋ جانە ولاردىڭ تۋىنداۋىنا اسەر ەتەتىن قاۋىپتى فاكتورلاردىڭ، ولاردىڭ ءورشۋىن الدىن الۋ، حالىق دەنساۋلىعىن نىعايتۋ ءۇشىن قازاقستاندا ۇلتتىق سكرينينگتىك باعدارلاما ەنگىزىلگەن. ول حالىقتىڭ نىسانالى توپتارىنىڭ، ياعني ناقتى اۋرۋلار بويىنشا بەلگىلى ءبىر جاس توبىنداعى دەنى ساۋ تۇلعالاردىڭ جاپپاي پروفيلاكتيكالىق مەديتسينالىق تەكسەرىپ- قاراۋدان ءوتۋدى قاراستىرادى. سكرينينگ 2، ياعني 0 جاستان 18 جاسقا دەيىنگى بالالارعا جانە 30 جاستان 70 جاسقا دەيىنگى جاس ساناتىنا جاسالادى. بالالار كامەلەتكە تولعانعا دەيىن جىل سايىن پروفيلاكتيكالىق تەكسەرىپ- قارۋدان ءوتىپ تۇرۋلارى ءتيىس. تەكسەرىپ- قاراۋ ەشقانداي سيمپتومدار بولماعان جاعدايدا دا، دەنساۋلىققا دەگەن سەنىمدىلىكتىڭ بولۋى ءۇشىن جاسالادى. سكرينينگ تەگىن جاسالادى. پروفيلاكتيكالىق تەكسەرىپ- قاراۋدى قارجىلاندىرۋ مىندەتتى الەۋمەتتىك مەديتسينالىق ساقتاندىرۋ قورىنىڭ قارجىسى ەسەبىنەن ىسكە اسىرىلادى، سوندىقتان سكرينينگ ءوتۋ ءۇشىن ساقتاندىرىلۋشى مارتەبەسىنىڭ بولۋى قاجەت.
«سوڭعى جىلدارى سكرينينگتىك باعدارلامالاردىڭ كەڭەيۋىنە بايلانىستى قازاقستاندا قاناينالىم جۇيەسىنىڭ اۋرۋلارى، ونىڭ ىشىندە ەگدە جانە قارتايعان جاستا جۇرەكتىڭ يشەميالىق اۋرۋلارىنىڭ ءوسۋ بارىسى انىقتالدى. سوندىقتان قاناينالىم جۇيەسىنىڭ اۋرۋلارىن انىقتاۋ بويىنشا امبۋلاتوريالىق- ەمحانالىق جۇمىستاردىڭ تيىمدىلىگىن ارتتىرۋ قاجەت. ەڭ ماڭىزدى پروبلەمالاردىڭ ءبىرى - قانت ديابەتى اۋرۋىنا شالدىققاندار سانىنىڭ ءوسۋى. الەۋمەتتىك ماڭىزدى اۋرۋلار زور ەكونوميكالىق زيان كەلتىرەدى جانە ءومىر ءسۇرۋ ۇزاقتىعىن تومەندەتەدى. سونىمەن قاتار، ەرتە انىقتاۋ جانە دياگنوستيكالاۋ مەن ەمدەۋدىڭ جوعارى تەحنولوگيالىق ادىستەرىن كەڭىنەن قولدانۋ قاناينالىم جۇيەسىنىڭ اۋرۋلارى جانە قانت ديابەتىنەن بولاتىن ءولىم سانىنىڭ كورسەتكىشتەرىن ازايتۋعا مۇمكىندىك بەرەدى»، - دەيدى كارديولوگيا جانە ىشكى اۋرۋلار عىلىمي- زەرتتەۋ ينستيتۋتىنىڭ دارىگەرى راۋشان قابىكەنوۆا.
وڭىرلەرمەن جۇمىس جۇرگىزۋ ءبولىمىنىڭ باسشىسى راۋشان قابىكەنوۆانىڭ ايتۋىنشا، باعدارلامانى جۇزەگە اسىرۋ شەڭبەرىندە كارديولوگيا جانە ىشكى اۋرۋلار عىلىمي- زەرتتەۋ ينستيتۋتى توقسان سايىن ەرەسەك تۇرعىندار اراسىندا قاناينالىم جۇيەسىنىڭ اۋرۋلارى جانە قانت ديابەتىن ەرتە انىقتاۋ بويىنشا حالىقتىڭ نىسانالى توپتارىنا سكرينينگتىك تەكسەرۋ جۇرگىزەدى.
«رەسپۋبليكامىزدىڭ امبۋلاتوريالىق- ەمحانالىق ۇيىمدارىنىڭ بەلسەندى جۇمىسىنىڭ ناتيجەسىندە نىسانالى تەكسەرىپ- قاراۋدان وتەتىندەردىڭ سانى جىل سايىن ارتىپ كەلەدى. وسىلايشا، تەك 2020 -جىلدىڭ 12 ايىندا 1,5 ميلليون استام ادام، ياعني تەكسەرۋگە ءتيىستى تۇرعىنداردىڭ %94 ى قاناينالىم جۇيەسىنىڭ اۋرۋلارىنا قارالدى. حالىقتىڭ نىسانالى توپتارىن تەكسەرىپ- قاراۋدىڭ ناتيجەسىندە 65 مىڭنان استام ادامدا (%4,3) قاناينالىم جۇيەسىنىڭ اۋرۋىنىڭ ەرتە ساتىسى انىقتالدى، ولاردىڭ ىشىندە %88 ى ديسپانسەرلىك ەسەپكە الىندى»، - دەيدى ول.
قانت ديابەتىن ەرتە انىقتاۋ ءۇشىن بىلتىر سكرينينگپەن 1,6 ميلليون استام ادام قامتىلدى.
«بۇل تەكسەرىلۋگە تيىستىلەردىڭ %93 ىن قۇرايدى. بۇل رەتتە 12 مىڭنان استام قانت ديابەتىمەن اۋىراتىندار (%0,78) انىقتالدى. ولاردىڭ بارلىعىن ەمحانالار ديسپانسەرلىك ەسەپكە الىپ، تۇراقتى تۇردە تەگىن دارىمەن قامتاماسىز ەتەتىن بولادى. سكرينينگتىك زەرتتەۋلەر الەۋمەتتىك ماڭىزى بار اۋرۋلاردى ەرتە كەزەڭدە انىقتاۋعا مۇمكىندىك بەرەدى. سوندىقتان پروفيلاكتيكالىق ماقساتتا ونى ۇنەمى جانە ۋاقىتىلى ءوتىپ تۇرۋ قاجەت»، - دەدى راۋشان قابىكەنوۆا.
