وزبەكستاندا ايتەكە بي كۇنى اتالىپ ءوتۋى مۇمكىن
مادەنيەت جانە سپورت مينيسترلىگى، «قازاق تۋريزم»، قازاقستان مۇسىلماندارى ءدىني باسقارماسىنىڭ وكىلدەرى جانە تۋريستىك وپەراتورلار ناۋاي وبلىسىنا بارىپ، بابا رۋحىنا تاعزىم ەتتى. وزبەكستاننىڭ ناۋاي وبلىسىندا 40 مىڭ قازاق تامىرىن تەرەڭگە جايىپ، ۇرپاق ءوربىتىپ وتىر. قانداستارىمىز ءتىلى مەن ءدىلىن ساقتاپ، ءداستۇرىن بەرىك ۇستانعان. بۇل وڭىردە كىشى ءجۇزدىڭ باس ءبيى ايتەكە بابامىزدىڭ سۇيەگى جاتىر. ءبىراق وراق اۋىز، وت ءتىلدى شەشەننىڭ ماڭگىلىك مەكەنى وسىندا ەكەنىن كوپ قازاقستاندىق بىلە بەرمەيتىن كورىنەدى.
بەكتەمىر ىسقاقوۆ، ق م د ب جانىنداعى قاجىلىق كومپانيانىڭ ديرەكتورى:
- وسىندا ايتەكە بي بابامىز جاتقانىن كوپ ادام بىلە بەرمەيدى. وسى بابالارىمىزدىڭ رۋحىنا تاعزىم ەتىپ، ولارعا دۇعا جاساپ، وسكەلەڭ ۇرپاققا تانىتىپ، ولاردىڭ ونەگەلى ءومىرىن دارىپتەۋ - ءبىزدىڭ مىندەتىمىز.
كىشى جۇزگە توبە بي بولىپ توردە وتىرعان بابامىزدى دارىپتەۋ ءۇشىن ىرگەدەگى كورشىلەر سەپتەسۋگە دايىن ەكەنىن جەتكىزدى. بۇل ورايدا جەرگىلىكتى بيلىك ايتەكە بي تۋرالى بەينەروليكتەردى قارجىلاندىرۋعا ءازىر. قازاقستاننان تۋريستەر كوپتەپ كەلسە، بۇدان الا تاقيالى اعايىن دا ۇتادى.
جاۆلون حاسانوۆ، ناۋاي وبلىسى تۋريزمدى دامىتۋ باسقارماسىنىڭ باسشىسى:
- وكىنىشكە قاراي، پاندەميانىڭ سالدارىنان تۋريزم تۇرالاپ قالعانىن بىلەسىزدەر. ايتپەسە قازاقستاننان كەلەتىن تۋريستەردىڭ سانى 2019 -جىلى 80 پروتسەنت ءوسىپ، 12 مىڭ ادامدى قۇرادى. ەندى ءبىز قازاقستاندىق ارىپتەستەرىمىزبەن تاجىريبە الماسىپ، تۋريزم سالاسىنا ينۆەستيتسيا تارتىپ، تۋربيزنەس اراسىنداعى ءوزارا ىنتىماقتاستىقتى دامىتۋعا كەلىسىپ وتىرمىز. ول ءۇشىن ەلىمىزدىڭ مادەنيەت جانە سپورت مينيسترلىگى مەن ناۋاي وبلىسىنىڭ اكىمدىگى تۋريزم سالاسىنداعى ىنتىماقتاستىق جونىندەگى مەموراندۋمعا قول قويىپ، سالانى بىرلەسە دامىتۋعا ۋاعدالاستى.
«قوس مەملەكەت تۋريزم يندۋسترياسىنداعى ءبىر- ءبىرىنىڭ جوعىن تۇگەندەي الادى»، دەيدى ماماندار.
بەكتەمىر ىسقاقوۆ، ق م د ب جانىنداعى قاجىلىق كومپانيانىڭ ديرەكتورى:
- وتىراردا ارىستان باب بابامىز بار. ولار دا وزبەكستان حالقىنا قىزىعۋشىلىق تۋعىزادى. وزبەكستان حالقىنىڭ تۋريستەرى دە قوجا احمەت ياسساۋي بابامىزدىڭ باسىنا بارىپ، دۇعا جاساپ جاتادى.
ءلاززات احانوۆا، «وزبەكستان» تۋريستىك برەندىنىڭ قازاقستانداعى قۇرمەتتى ەلشىسى:
- ناۋاي وبلىسىنىڭ اكىمدىگىنە ايتەكە ءبيدىڭ تۋعان كۇنىن جىل سايىن اتاپ وتەيىك دەپ ۇسىندىق. 23 - ناۋرىزدا ەكەن. ناۋرىزدىڭ كەزىندە ءۇش كۇندىك فەستيۆال وتكىزەتىن بولساق، كوپ قازاقستاندىققا قىزىق بولادى دەپ ويلايمىن. ارينە، ءبىز دە وسىندا كەلىپ، ءوز جەرىمىزدى ايتىپ، وزبەكستان ازاماتتارىنا ءبىزدىڭ جەرىمىزدە قانداي قىزىق نارسەلەر بار، سول جاققا ءبىز دە شاقىرىپ وتىرامىز.
ناۋايدە قازاق پەن قاراقالپاقتىڭ مادەنيەتى توعىسقان كەنيمەح دەيتىن جەر بار. قازىر وبلىس حاكىمى وسى جەردە ءساۋىر ايىندا ەكى ەل جاستارىن بىرىكتىرىپ، حالىقارالىق فەستيۆال وتكىزۋدى ۇسىنىپ وتىر. وزبەك جەرىندە توپىراق بۇيىرعان اعايىننىڭ وشاعى سونبەي، كوگەرىپ- كوكتەگەنىن كورسىن، ايتەكە بيدەي بابامىزدىڭ رۋحىنا تاعزىم ەتسىن دەگەن نيەتپەن.
www.24.kz
