قازاقستاندىق ۆاكسينانى سالدىرعان ەرىكتىلەردىڭ جاعدايى قانداي
باسقوسۋدا وبلىس اكىمىنىڭ سۇراعىنا دەنساۋلىق ساقتاۋ باسقارماسىنىڭ باسشىسى اسەت قاليەۆ جاۋاپ بەردى.
«جامبىلدىقتارعا ەكى ۆاكسينا ۇسىنىلادى. ونىڭ ءبىرى - رەسەيلىك سپۋتنيك V، ال ەكىنشىسى قازاقستاندىق ۆاكسينا. جاپپاي ۆاكسيناتسيالاۋ ءۇشىن 140 مەديتسينالىق قىزمەتكەر وقىتۋدان ءوتتى»، - دەپ جاۋاپ بەردى اسەت قالييەۆ.
سونداي- اق، بەردىبەك ساپاربايەۆ QazCovid-ۆاكسيناسىن سىناقتان وتكىزۋ اياسىندا كوروناۆيرۋسقا قارسى ۆاكسينا العان ەرىكتىلەردىڭ جاي- كۇيىن سۇرادى.
«ولاردا بارلىعى جاقسى، دەنساۋلىعىنداعى كورسەتكىشتەر قالىپتى»، - دەپ جاۋاپ بەردى ءا. قالييەۆ.
ايماق باسشىسى ۆاكسيناتسيا ماسەلەسىن ەرەكشە باقىلاۋدا ۇستاپ، بۇقارالىق اقپارات قۇرالدارىن تارتا وتىرىپ، وسى باعىتتاعى اقپاراتتىق- ءتۇسىندىرۋ جۇمىستارىن كۇشەيتۋدى تاپسىردى.
«جاپپاي ۆاكسيناتسيالاۋدىڭ ماڭىزدىلىعىن وبلىستىڭ ءاربىر تۇرعىنىنا جەتە ءتۇسىندىرۋ قاجەت، ويتكەنى مۇنىڭ ءبارى ولاردىڭ دەنساۋلىعى ءۇشىن جاسالۋدا»، - دەپ اتاپ ءوتتى وبلىس اكىمى.
بۇدان سوڭ ايماق باسشىسى وبلىس ورتالىعىنداعى جانە جاعدايى ناشار اۋداندارداعى كوروناۆيرۋس بويىنشا جاۋاپتى تۇلعالارعا جۇگىندى. اكىمدەردىڭ ورىنباسارلارى بۇل ماسەلەنى باقىلاۋدا ۇستاپ، احۋالدى جاقسارتۋ ءۇشىن قولدان كەلگەننىڭ ءبارىن جاساپ جاتقاندارىنا سەندىردى. جيىن سوڭىندا ءوڭىر باسشىسى وبلىستىق ىشكى ساياسات باسقارماسىنا كوروناۆيرۋستىق ينفەكسيا ماسەلەسى بويىنشا ءتۇسىندىرۋ شارالارىن كۇشەيتۋدى، ارداگەرلەر كەڭەسىمەن دە ىنتىماقتاستىقتا جۇمىس جاساۋدى تاپسىردى. ويتكەنى، وسى اعا بۋىن وكىلدەرى قازىر تىيىم سالىنعان تويلاردان قالمايتىنىن، بۇل ولاردىڭ دەنساۋلىعى ءۇشىن وتە قاۋىپتى ەكەنىن جەتكىزىپ، ايماقتاعى بەدەلدى اقساقالدار وعان ىقپال ەتە الاتىنىن العا تارتتى.
«راسىندا، تۇرعىندار بوساڭسىپ كەتتى، سودان وبلىسىمىز «سارى» ايماققا ەنۋ قاۋپىندە تۇر. مۇنىڭ سالدارى سىزدەرگە بەلگىلى. قازىر ءارقايسىمىز كوروناۆيرۋسپەن كۇرەسكە بار كۇش- جىگەرىمىزدى جۇمساۋىمىز كەرەك»، - دەپ تۇيىندەدى بەردىبەك ساپاربايەۆ.
اۆتور: سايا سەمباي
