كوروناۆيرۋس ۆاكسيناسىن سالدىرعانعا دەيىن جانە ودان كەيىن وقشاۋلانۋ كەرەك پە

بۇل سۇراققا ق ر د س م سانيتاريالىق- ەپيدەميولوگيالىق باقىلاۋ كوميتەتىنىڭ ۆاكسيناعا كونەتىن ينفەكسيالاردى باقىلاۋ باسقارماسىنىڭ باسشىسى نۇرشاي ازىمبايەۆا جاۋاپ بەردى، دەپ حابارلايدى قازاقپارات ءتىلشىسى.

«شىن مانىندە وقشاۋلانۋ - ادامداردىڭ باسقا بىرەۋلەرگە ۆيرۋس جۇقتىرۋىنىڭ الدىن الۋ ءۇشىن كەرەك. مۇنداي جاعدايدا كوروناۆيرۋس ۆاكسيناسىن سالدىرعانعا دەيىن جانە ودان كەيىن وقشاۋلانۋدىڭ قاجەتى جوق. ءبىراق ادامدار ەڭ الدىمەن ءوزىنىڭ قاۋىپسىزدىگىن ويلاۋعا ءتيىس. سول سەبەپتى ۆاكسينا الاتىن ادام ءۇشىن تولىعىمەن كارانتين رەجيمىن ساقتاعان دۇرىس. ۆاكسينا سالدىراتىن كەز كەلگەن ادامنىڭ ەڭ بىرىنشىدەن دەنى ساۋ بولۋى كەرەك. ەكپە العان ادام قورشاعان ورتاعا قاۋىپسىز. ەكپە العان ادامعا كوروناۆيرۋس جۇقپايدى. ياعني، ۆاكسينا قۇرامىندا ينفەكسيالىق نەگىز جوق»، - دەدى نۇرشاي ازىمبايەۆا ونلاين كونفەرەنسيا بارىسىندا.

باسقارما باسشىسى دەگەنمەن ەكپە العان ادام ساقتىق شارالارىن ساقتاۋى كەرەكتىگىن ەسكە سالدى. «جالپى ۆاكسينالاۋعا قاتىستى وقشاۋلانۋدىڭ قاجەتى جوق»، - دەپ ءسوزىن شەگەلەي ءتۇستى ول. ەسكە سالا كەتسەك، بۇعان دەيىن نۇرشاي ازىمبايەۆا اقىلى ەكپە كابينەتتەرىندە ك ۆ ي- گە قارسى ۆاكسينا سالىنبايتىنىن ەسكەرتكەن ەدى.

اۆتور: ايان بەكەن ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى