ماڭعىستاۋلىق وقۋشى تەرى اۋرۋلارىن انىقتايتىن سايت ويلاپ تاپتى
نازاربايەۆ زياتكەرلىك مەكتەبىندە ءبىلىم الىپ جۇرگەن ايمۇرات جەتكىزگەنوۆ بۇل سايتتى عىلىمي جوبا اياسىندا جاساعان. كەيىن دارىگەردىڭ كەڭەسىمەن ارنايى پلاتفورماعا اينالدىرۋ ۇسىنىسى تۇسكەن. پورتال ارقىلى بورتپەنىڭ قانداي اۋرۋ ەكەنىن بىلۋگە بولادى. ول ءۇشىن جارانى سۋرەتكە ءتۇسىرىپ، سايتقا ەنگىزسە جەتكىلىكتى. ونداعى ارنايى باعدارلامالىق كود 9 ءتۇرلى دەرتتى انىقتاپ بەرە الادى. سايت «SkinSaver» دەپ اتالادى.
«مەديتسينا ماماندارى قانداي دا ءبىر دەرتتى ءوزى انىقتاي الماسا، نە كۇمانى بولسا وسى سايتقا ءوزىنىڭ ناۋقاسىنداعى بورتىكتىڭ سۋرەتىن ەنگىزىپ، وسى سايت ارقىلى دەرتتى ناقتىلاپ، انىقتاۋعا بولادى»، - دەدى ايمۇرات جەتكىزگەنوۆ.
ال، وقۋشىنىڭ جەتەكشىسى، ينفورماتيكا ءپانى مۇعالىمى اقمارال المابەكوۆا «SkinSaver» سايتىن جاساۋ ارقىلى دەرماتولوگيا سالاسىنداعى دەرەكتەر بازاسىن كوبەيتكەنىن ايتادى. وسىلايشا وقۋشى مەديتسينا قىزمەتكەرلەرى مەن ستۋدەنتتەرگە كومەك كورسەتكىسى كەلگەن. دەنەدەگى كەز كەلگەن بورتپەنى فوتوسۋرەت ارقىلى انىقتاۋدا وقۋشىلار Python باعدارلامالاۋ ءتىلىن قولدانعان.
