كوروناۆيرۋس: قىتايدا ۇلتتىق جاڭا جىلى كەزىندە جولاۋشىلار اعىنى رەكورد دەڭگەيدە تومەندەۋى مۇمكىن
قىتايداعى ۇلتتىق جاڭا جىل بيىل 12- اقپانعا تۇسپا-تۇس كەلەدى، الايدا ەلدەگى تۇرعىنداردىڭ جاپپاي اۋىلى مەن تۋعان ۇيىنە ساپار شەگۋ كەزەڭى - (چۋنيۋن دەپ اتايدى) 28- قاڭتاردا باستالدى.
ول قىرىق كۇنگە سوزىلادى. ەڭ ءىرى تۋريستىك «Qunar» سايتىنىڭ حابارلاۋىنشا، مەرەكە قارساڭىندا رەيستەر مەن قوناقۇيلەردى برونداۋدىڭ ايتارلىقتاي ءوسۋى بايقالمادى.
«China Railway» تەمىرجول وپەراتورى دا تەمىرجول ساپارى 407 ميلليوننان 296 ميلليونعا دەيىن تومەندەيتىنىن بولجاپ وتىر. قىتاي كولىك مينيسترلىگىنىڭ حابارلاۋىنشا، بيىل «چۋنيۋن» كەزىندە ەل بويىنشا شامامەن 1,15 ميلليارد ساپار كۇتىلىپ وتىر. جەرگىلىكتى ب ا ق جازعانداي، بۇل - قىتاي بيلىگى ستاتيستيكالىق مالىمەتتەردى جاريالاي باستاعان سوڭعى 18 جىلداعى ەڭ تومەنگى كورسەتكىش.
وسىلايشا، 2021-جىلى «چۋنيۋن» كەزىندە جولاۋشىلار اعىنى 2019-جىلعى دەڭگەيدەن %60 تومەندەيدى (سول جىلى كولىكتىڭ بارلىق تۇرىمەن 3 ميلليارد ساپار جاسالدى). قىتايدا اي كۇنتىزبەسى بويىنشا جاڭا جىلدى وتباسىمەن بىرگە اتاپ ءوتۋ داستۇرگە اينالعان، سوندىقتان ەلدىڭ ءار تۇرعىنى وسى ۋاقىتتا تۋعان جەرىنە بارۋعا تىرىسادى. وسىعان بايلانىستى قىتايدىڭ كوكتەم مەرەكەسى ەلدىڭ بۇكىل كولىك جۇيەسى ءۇشىن ەڭ اۋىر كەزەڭنىڭ ءبىرى سانالادى.
الايدا بيىلعى جىلى كوروناۆيرۋس پاندەمياسىنا بايلانىستى ءجۇرىس-تۇرىس اۋقىمى ادەتتەگىدەي بولمايدى. ەلدەگى ساپارلار سانىنىڭ تومەندەۋىنە بىرنەشە سەبەپ بار. قىتاي بيلىگىنىڭ كەي وڭىردە كوروناۆيرۋستىڭ ورشۋىنە جول بەرمەۋ شارالارىن قابىلدادى. سونىڭ ىشىندە مىندەتتى تۇردە COVID-19 تەستىسىن تاپسىرۋ، ءبىرقاتار جاعدايدا كارانتين جاريالاۋ، سونمەن قاتار ۇكىمەتتىڭ اسا ءبىر قاجەتتىلىك بولماسا ساپارعا شىقپاۋ جانە جاڭا جىلدى تۇرعىلىقتى جەرلەردە اتاپ وتۋگە شاقىرۋىنا بايلانىستى.
