سايلاۋ: مەملەكەتتىك حاتشى قىرىمبەك كوشەربايەۆ ءوز تاڭداۋىن جاسادى
قىرىمبەك ەلەۋ ۇلى ءوز تاڭداۋىن ەلورداداعى 126№ سايلاۋ ۋچاسكەسىندە جاسادى. اتالمىش سايلاۋ ۋچاسكەسى ماقسۇت نارىكبايەۆ اتىنداعى 79№ مەكتەپ-ليتسەيدە ورنالاسقان.
«بۇگىن ەلىمىز ءۇشىن ايرىقشا ءسات دەپ ويلايمىن. حالقىمىزدىڭ ەڭ اسىل مۇراتى - تاۋەلسىزدىكتى نىعايتۋ جولىندا ماقساتىمىز، سونداي-اق وسكەلەڭ ۇرپاق الدىندا ۇلكەن جاۋاپكەرشىلىگىمىز بار. سونى ەسىندە ۇستاي تۇرا حالقىمىز بۇرىننان تانباي كەلە جاتقان ءوزىنىڭ پاراساتتىلىعىن، ىنتىماعى مەن بىرلىگىن كورسەتەدى دەپ ويلايمىن. سول جاۋاپكەرشىلىكتىڭ دەڭگەيىندە بولامىز. الەمدە ءارتۇرلى جاعداي ورىن الىپ، قوعامدى جىك-جىككە بولگەن ءارقيلى وقيعالار بولىپ جاتىر. وسى سايلاۋ - حالقىمىزدىڭ بىرلىگى مەن ىنتىماعىنىڭ، تاۋەلسىزدىك جولىندا ەڭ ىزگى قاسيەتتەرىمىزدى كورسەتەدى دەگەن ويدامىن»، - دەدى قىرىمبەك كوشەربايەۆ.
ايتا كەتەيىك، قازاقستان پرەزيدەنتى قاسىم-جومارت توقايەۆ 2020-جىلدىڭ 20- قازانىندا پارلامەنت ءماجىلىسى مەن ءماسليحات دەپۋتاتتارى سايلاۋىن وتكىزۋ تۋرالى جارلىق شىعارعان بولاتىن. بۇگىن 12 وڭىردە 8141 سايلاۋ ۋچاسكەسىندە داۋىس بەرۋ باستالدى.
