تۆيتتەر جەلىسى دونالد ترامپتىڭ اككاۋنتىن ءبىرجولاتا بلوكتاپ تاستادى

Twitter كومپانياسى وسىعان بايلانىستى مالىمدەمە جاسادى. «@realDonaldTrump اككاۋنتىندا جاريالانعان سوڭعى تۆيتتەردى جانە ونىڭ مازمۇنىن، اسىرەسە ونىڭ Twitter قاۋىمىندا قالاي قابىلدانىپ، ءارى قاراي قانداي كونتەكستە تاراعانىن ەگجەي- تەگجەيلى تەكسەرىپ شىققان سوڭ وسىنداي شەشىم قابىلدادىق. ءبىز زورلىق- زومبىلىققا اپارىپ سوعۋ قاۋپىن ەسكەرە وتىرىپ اككاۋنتتى ءبىرجولا وشىردىك. وسى اپتاداعى سۇمدىق وقيعالاردان كەيىن ءبىز Twitter قولدانۋ تالاپتارىن قايتادان بۇزۋ ءدال وسىنداي جاعدايلارعا اكەلەتىنىن حابارلاعان بولاتىنبىز.

ءبىزدىڭ تالاپتار تاڭداۋلى رەسمي تۇلعالار مەن الەمدىك كوشباسشىلاردان تىكەلەي اقپارات الۋعا مۇمكىندىك بەرەدى. الايدا ءبىز ءاۋ باستان بۇل اككاۋنتتار ءبىزدىڭ ەرەجەگە باعىنۋعا ءتيىس ەكەنىن جانە ولار Twitter-دى زورلىق- زومبىلىق تۋعىزۋ ءۇشىن پايدالانا المايتىنىن انىقتاپ تۇسىندىرگەن ەدىك» دەلىنگەن كومپانيا حابارلاماسىندا. Twitter سونىمەن قاتار دونالد ترامپتىڭ سوڭعى تۆيتتەرى مەن ولاردىڭ كەي قولدانۋشىلارعا قالاي اسەر ەتكەنىنە جاسالعان اناليزدىڭ قورىتىندىسىن جاريالادى. كومپانيا بۇل تۆيتتەر جاڭادان زورلىق- زومبىلىق جاساۋعا سەبەپ بولۋى مۇمكىن دەپ وتىر. پرەزيدەنت كەزىندە دونالد ترامپ 26 مىڭنان استام تۆيت جاريالاعان. كۇنىنە ورتا ەسەپپەن 18 تۆيت جازىپ وتىرعان. Twitter شەشىمى جايلى دونالد ترامپ بىلاي دەدى:

«ءبىزدىڭ اۋزىمىزدى ەشكىم جابا المايدى. جاقىن ارادا ونىڭ ورنىن باساتىن جاڭا پلاتفورما جاساۋدى قاراستىرىپ جاتىرمىن». ول بۇل سوزدەردى ءوزىنىڭ رەسمي Twitter اككاۋنتىندا جازدى، الايدا كومپانيا ونى بىردەن ءوشىرىپ تاستادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى