پرەزيدەنت ناۋرىزدى اتاپ ءوتۋ جۇيەسىن قۇرۋعا نازار اۋدارعانى قۋانتادى - سەرىكزات دۇيسەنعازين
مۇنداي پىكىردى ايتىسكەر اقىن، فيلولوگيا عىلىمدارىنىڭ كانديداتى سەرىكزات دۇيسەنعازين ءبىلدىردى، دەپ حابارلايدى قازاقپارات ءتىلشىسى.
«پرەزيدەنتتىڭ 30 جىلدا اتقارىلعان ەلەۋلى ىستەردى ساراپتاپ، الداعى ون جىلدىقتىڭ جوسپارىن تۇزگەن ماقالاسى ءبارىمىزدى تولعانتتى. ماقالادا كوبىنە ۇلتتىق دۇنيەلەرگە باسىمدىق بەرىلگەن. ال وزىمە ەرەكشە ۇناعان باستامانىڭ ءبىرى - ناۋرىز مەيرامىن اتاپ ءوتۋ جۇيەسىن جاساۋ.
ويتكەنى، بىزدە ناۋرىزدى مەرەكەلەۋ كونتسەپتسياسى جوق. وسى تاقىرىپقا كەلگەندە كوپ سىن ايتىلادى. ءتول مادەنيەتىمىزدى دارىپتەۋ ءۇشىن ناۋرىزدىڭ ءمان- ماڭىزى ەرەكشە. سوندىقتان پرەزيدەنتتىڭ ءوزى وسى ماسەلەگە باسا نازار اۋدارعانى - بارلىعىمىزدى قۋانتىپ وتىر. سونىمەن قاتار پرەزيدەنت ءوز ماقالاسىندا سوڭعى كەزدەرى سولتۇستىك وڭىرلەردىڭ شەكاراسىنا قاتىستى ءجيى ايتىلىپ جۇرگەن ارانداتۋشىلىق وي-پىكىرلەرگە ناقتى نۇكتە قويا بىلگەن.
مەملەكەت باسشىسى قازاقستاننىڭ حالىقارالىق ۇيىمدارمەن مويىندالعان شەكاراسى بار جانە وعان ەشكىمنىڭ كۇمانى بولماۋعا ءتيىس ەكەنىن اشىپ ايتتى»، - دەدى سەرىكزات دۇيسەنعازين.
بۇدان بولەك ايتىسكەر اقىن مەملەكەت باسشىسىڭ ساپالى تاريحي كينوفيلمدەردى كوپتەپ ءتۇسىرىپ، سول ارقىلى جاس بۋىندى تاربيەلەۋ قاجەتتىگى ايتىلعان باستاماسىنا قولداۋ ءبىلدىردى.
«كينو سالاسى ەلىمىزدە كەمشىندەۋ. فيلمدەر ءتۇسىرىلدى، ءبىراق ول تۋىندىلار ارقىلى تولىق تاريحىمىزدى الەمگە تانىتا المادىق. سونىڭ سالدارىنان كەيبىر كورشىلەرىمىز «قازاق حالقىنىڭ جەرى بىزدىكى» دەگەن پىكىر ايتىپ ءجۇر. سوندىقتان ءبىز تاريحىمىزدىڭ تەرەڭنەن باستاۋ الاتىنىن دالەلدەۋىمىز قاجەت. وسى ورايدا پرەزيدەنت قاسىم- جومارت توقايەۆ التىن وردانىڭ تاريحى سۇرانىپ تۇرعانىن ايتتى. ياعني، ءبىز جارتى الەمدى بيلەگەن التىن وردانىڭ تاريحي شەكاراسىن يەمدەنىپ قالعان مەملەكەتتىڭ جالعاسىمىز»، - دەپ اتاپ ءوتتى سەرىكزات دۇيسەنعازين.
ەسكە سالا كەتەيىك، مەملەكەت باسشىسىنىڭ «تاۋەلسىزدىك بارىنەن قىمبات» اتتى ماقالاسىنداعى تاريحي كينوكارتينالاردى ءتۇسىرۋ باستاماسىنا قاتىستى بەلگىلى كينورەجيسسەر، ق ر ەڭبەك سىڭىرگەن قايراتكەرى ساتىبالدى نارىمبەتوۆ تە پىكىر بىلدىرگەن ەدى.
