فرانسيا كوروناۆيرۋسقا قارسى ۆاكتسينالاۋ ستراتەگياسىن وزگەرتتى
فرانسيا ۇكىمەتىن سوڭعى كەزدەرى حالىقتى ۆاكتسينالاۋ ۇدەرىسىنىڭ سىلبىرلىعى ءۇشىن جەرگىلىكتى قوعامداستىق قاتتى سىناپ ءجۇر. قارتتار ۇيىندەگى ازاماتتاردى ۆاكتسينالاۋدى قاراستىراتىن ءبىرىنشى فازانى دەنساۋلىق ساقتاۋ مينيسترلىگى تىم باياۋلاتىپ جىبەردى. ۆەدومستۆو وكىلدەرى ۆاكتسينا دوزاسىن جىبەرمەي تۇرىپ، مەكەمەلەردەن ەكپە العىسى كەلەتىن ازاماتتاردىڭ ءتىزىمىن جىبەرۋدى سۇراعان.
قارتتار ءۇيى تۇرعىندارىنىڭ كەلىسىمىن الۋمەن بايلانىستى جاعدايدىڭ كۇردەلەنىپ كەتۋى، ۆاكتسينا الدىنداعى مەديتسينالىق تەكسەرۋلەر دە بۇل ۇدەرىستى تەجەي ءتۇستى.
«كوپ ادامداردىڭ ۆاكتسينا الۋعا دەگەن قۇقىعى كەڭەيەدى، تىركەۋ پروتسەدۋرالارى دا جەڭىلدەيدى»، - دەدى فرانسيا تەلەۆيزياسىنىڭ ەفيرىندە دەنساۋلىق ساقتاۋ ءمينيسترى.
ەندى فرانتسيادا پرەپاراتتى ۇيدەن قىزمەت كورسەتەتىن مەديتسينا ماماندارى مەن 50 دەن اسقان ءورت سوندىرۋشىلەر دە الا الادى. بۇعان دەيىن وسى كاتەگورياداعى ازاماتتار فرانسياداعى بەس دەڭگەيلى ۆاكتسينالاۋ جوسپارىنىڭ ەكىنشى بولىگىنە كىرگەن.
«ۆاكسينا العان ازاماتتار سانى الداعى بىرنەشە كۇندە ءبىزدىڭ كورشىلەرىمىزدى باسىپ وزادى»، - دەدى و. ۆەران.
ونىڭ سوزىنشە، اپتانىڭ ورتاسىنا تامان تاعى 100 اۋرۋحانا ۆاكتسينالاۋعا دايىن بولادى، سونداي-اق 100 ۆاكسينالاۋ ورتالىعى بيىلعى جىلدىڭ قاڭتارىندا اشىلادى.
