اتىراۋلىق وقۋشى وسىمدىكتەن بوياۋ الۋدىڭ جاڭا ءتاسىلىن ۇسىندى

وبلىستىق ءبىلىم باسقارماسى باسپا ءسوز قىزمەتىنىڭ مالىمەتىنشە، اينۇر مۇراتوۆا ماحامبەت اۋدانىنداعى قوسارال ورتا مەكتەبىندە وقيدى. ول «دارىن» رەسپۋبليكالىق- عىلىمي پراكتيكالىق ورتالىعى ۇيىمداستىرعان ءال- فارابي اتىنداعى رەسپۋبليكالىق عىلىمي جوبالار بايقاۋىنا قاتىسقان. بايقاۋدا «تابيعي ينديكاتور الۋ جانە قولدانۋ» تاقىرىبىندا جوبا قورعاپ، جۇلدەلى 1-ورىندى جەڭىپ العان. عىلىمعا دەن قويعان وقۋشىنىڭ عىلىمي جەتەكشىسى ساندۋعاش قابازوۆانىڭ ايتۋىنشا، ونلاين رەجيمدە وتكەن بايقاۋعا ەلىمىزدىڭ بارلىق وڭىرىنەن 263 وقۋشى قاتىسقان.

«وقۋشىم ەكەۋمىز بۇرىن زەرتتەلمەگەن، ءبىراق كوپتەن ويىمىزدا جۇرگەن تاقىرىپتى تاڭدادىق. اينۇر زەرتتەۋىندە تابيعي شيكىزاتتان قولمەن الۋعا بولاتىن ينديكاتورلاردى (تابيعي بوياۋلاردى) تاجىريبە جۇزىندە دالەلدەپ كورسەتتى. تابيعي وسىمدىكتەردىڭ قۇرامى قورشاعان ورتانىڭ اسەرىنە بايلانىستى ءتۇسىن ءجيى وزگەرتەتىنىن انىقتادى»، - دەدى ساندۋعاش قابازوۆا.

ال، اينۇر مۇراتوۆانىڭ سوزىنشە، ءوزىنىڭ عىلىمي جاڭالىعىن الداعى ۋاقىتتا حيميا ساباعىندا زەرتتەۋ تۇرىندە عانا ەمەس، تۇرمىستا دا قولدانۋعا بولادى. ول سونداي- اق، ىدىس جۋۋعا ارنالعان «ميف»، «Fairy»، «ا وs» سۇيىقتىقتارى مەن حوش ءيىستى سابىنداردىڭ بارلىعى وسىنداي حيميالىق ارەكەتتەسۋ ارقىلى الىناتىنىن جەتكىزدى.

«تۇرمىستا كەڭىنەن پايدالانىلىپ جۇرگەن جۋعىش زاتتار حيميا تىلىمەن ايتقاندا، سىلتىلىك جانە ءالسىز سىلتىلىك ورتادا دايىندالادى. سوندىقتان، تابيعي وسىمدىكتەردەن بوياۋ الۋ تاقىرىبىن الداعى ۋاقىتتا كەڭىرەك زەرتتەيمىن. تابيعي وسىمدىكتەردىڭ قۇرامىن، ولاردان تابيعي بوياۋ الۋ زەرتتەۋلەرى مەكتەپ باعدارلاماسىنىڭ 5،6-سىنىپتارداعى جاراتىلىس تانۋ، 7-سىنىپتىڭ حيميا وقۋلىقتارىنا ەنگىزىلسە، وقۋشىلاردىڭ عىلىمعا ىنتاسى ارتا تۇسەر ەدى»، - دەيدى اينۇر مۇراتوۆا.

ەسكە سالا كەتەلىك، بۇدان بۇرىن اتىراۋلىق وقۋشى الوە وسىمدىگىنەن سۋسابىن مەن يوگۋرت جاساپ شىعارعانىن جازعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى