قاسىم-جومارت توقايەۆ: جاس ۇرپاق بايتاق قازاقستاننىڭ عاجايىپ جاۋھارلارىن بىلۋگە ءتيىس
قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ «تاۋەلسىزدىك بارىنەن قىمبات» اتتى ماقالاسىندا وسى ماسەلەگە باسا نازار اۋداردى، دەپ حابارلايدى قازاقپارات ءتىلشىسى.
قاسىم-جومارت توقايەۆ ماقالاسىندا ەل مەن جەرگە دەگەن ماحاببات ءتالىم- تاربيەدەن باستالاتىنىن ايتادى. اتا-اناسىمەن بىرگە اۋلاسىنا اعاش ەكپەگەن، ۇلكەندەردىڭ جان-جانۋارعا مەيىرىمىن كورمەگەن، كىشكەنتايىنان تابيعاتتى ايالاۋعا داعدىلانباعان بالا وسكەندە تۋعان جەرىنە جانى اشىمايدى.
ياعني پرەزيدەنتتىڭ ايتۋىنشا، ماسەلە ەكولوگيادا ەمەس - وتانشىلدىقتا، زاڭدا ەمەس - سانادا.
«ەلى مەن جەرىن ءسۇيۋ ءۇشىن جاس ۇرپاق بايتاق قازاقستاننىڭ عاجايىپ جاۋھارلارىن بىلۋگە ءتيىس. باتىستا بوزجىرا مەن شەرقالا، كۇنگەيدە اقسۋ- جاباعىلى مەن سايرام- وگەم، جەتىسۋدا حان ءتاڭىرى مەن شارىن، كولساي مەن قايىڭدى، قاپال- اراسان، التىنەمەل مەن بۇرحان بۇلاق، شىعىستا مۇزتاۋ مەن شىڭعىستاۋ، مارقاكول مەن راحمان قاينارى، ارقادا بۋراباي مەن باياناۋىل، ۇلىتاۋ مەن قارقارالى، تەرىسكەيدە يمانتاۋ مەن ايىرتاۋ جانە باسقا دا كورىكتى جەرلەرىمىز جەتىپ ارتىلادى. جەر ءجانناتىن الىستان ىزدەۋدىڭ قاجەتى جوق. ءبارى وزىمىزدە بار. جاستارعا وسىنداي كەرەمەت تابيعاتىمىزدى تانىتىپ، ونى قادىرلەۋگە باۋلۋىمىز كەرەك»، - دەدى قاسىم- جومارت توقايەۆ.
