ق ر پرەزيدەنتى: ءتورتىنشى ونجىلدىقتىڭ بىزگە جۇكتەيتىن مىندەتى - قۋاتتى ەلدىڭ يەسى جانە كەمەل حالىق بولۋ
قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ «egemen Qazaqstan» گازەتىندەگى «تاۋەلسىزدىك بارىنەن قىمبات» اتتى ماقالاسىندا وسىلاي مالىمدەدى، دەپ حابارلايدى قازاقپارات.
«تاۋەلسىزدىكتىڭ وتىز جىلىن شارتتى تۇردە ءۇش ونجىلدىق بەلەسكە ءبولىپ قاراستىرۋعا بولادى. ونىڭ ءارقايسىسى اتقارعان ميسسياسى تۇرعىسىنان عاسىردىڭ جۇگىن ارقالاپ تۇر. مەن ازاتتىقتىڭ العاشقى ونجىلدىعىن جاڭا قازاقستاننىڭ ىرگەتاسىن قالاۋ كەزەڭى دەپ اتار ەدىم. وسى ۋاقىتتا ەلباسىنىڭ باسشىلىعىمەن مەملەكەتىمىزدىڭ نىشاندارى بەلگىلەنىپ، بيلىك جۇيەسى قالىپتاستى. ۇلتتىق ۆاليۋتامىز اينالىمعا ەندى. قارۋلى كۇشتەرىمىز قۇرىلدى. اتا زاڭىمىز قابىلداندى. شەتەلدەرمەن ديپلوماتيالىق قاتىناس ورناتىلدى. ەلىمىز بەدەلدى حالىقارالىق ۇيىمدارعا مۇشە بولدى»، دەدى پرەزيدەنت.
مەملەكەت باسشىسىنىڭ ايتۋىنشا، «قازاقستان - 2030» ستراتەگياسىن قابىلدانعان. شىعىستاعى كورشىمىزبەن شەكارامىز بەكىتىلگەن.
«باسقا دا ىرگەلەس مەملەكەتتەرمەن شەكارا جونىندەگى كەلىسسوزدەر قارقىندى جۇرگىزىلە باستادى. ەل اۋماعىن يادرولىق قارۋدان تولىق تازارتتىق. ەلوردامىزدى ارقا توسىنە كوشىردىك. نارىقتىق ەكونوميكاعا ءوتىپ، جەكەمەنشىك ينستيتۋتىن بەرىك ورنىقتىردىق. وتاندىق بيزنەستىڭ نەگىزىن قالادىق. جاستار الەمنىڭ ماڭدايالدى وقۋ ورىندارىندا ءبىلىم الا باستادى. ءتۇرلى داعدارىستاردان امان وتۋگە مۇمكىندىك بەرگەن ۇلتتىق قورىمىز قۇرىلدى. دۇنيە جۇزىنە تارىداي شاشىلعان قازاق بالاسىن اتاجۇرتقا شاقىرىپ، ۇلى كوشكە جول اشتىق. سونىڭ ناتيجەسىندە ەل ەڭسەسى تىكتەلىپ، ۇلتتىق رۋحىمىز كوتەرىلدى»، - دەدى پرەزيدەنت.
مەملەكەت باسشىسى، ەكىنشى ونجىلدىق - قازاق ەلىنىڭ كەرەگەسىن كەڭەيتۋ كەزەڭى دەپ اتاپ ءوتتى.
«وسى جىلداردا مەملەكەتىمىزدىڭ تۇعىرى نىعايىپ، ەكونوميكالىق الەۋەتىمىز ارتا ءتۇستى. قۇرلىقتاعى بارلىق شەكارامىزدى ايقىنداپ، زاڭ جۇزىندە بەكىتتىك. «مادەني مۇرا» باعدارلاماسىن جۇزەگە اسىرىپ، تاريحىمىزدى تۇگەندەدىك. سولتۇستىك ارالدى قۇتقارىپ، قاشقان تەڭىزدى قايتاردىق. الەمدىك جانە ءداستۇرلى دىندەر كوشباسشىلارىنىڭ سەزدەرىن، ەۋروپاداعى قاۋىپسىزدىك جانە ىنتىماقتاستىق ۇيىمىنىڭ، ازياداعى ءوزارا ءىس-قيمىل جانە سەنىم شارالارى كەڭەسىنىڭ سامميتتەرىن وتكىزۋگە جانە باسقا دا ءبىرقاتار ماڭىزدى حالىقارالىق جوبالارعا باستاماشى بولدىق.
ەلىمىزگە شەتەلدەن قوماقتى ينۆەستيتسيا تارتتىق. ەسىلدىڭ جاعاسىندا بوي كوتەرگەن ەڭسەلى ەلوردامىز ۇلتتىق يدەيامىزعا اينالدى.
«باتىس ەۋروپا - باتىس قىتاي» حالىقارالىق ءدالىزى سياقتى ءىرى ينفراقۇرىلىمدىق جوبالار قولعا الىندى. تۇرعىن- ءۇي قۇرىلىسى دا بۇرىن- سوڭدى بولماعان قارقىنمەن دامىدى»، - دەدى قاسىم-جومارت توقايەۆ.
مەملەكەت باسقىسىنىڭ ايتۋىنشا، ءۇشىنشى ونجىلدىقتا شاڭىراعىمىز بيىكتەپ، ءوسىپ- وركەندەپ، مەرەيلى مەملەكەتكە اينالدىق.
«شەكارا ماسەلەسىن ءبىرجولا شەشتىك. «قازاقستان - 2050» ستراتەگياسىن قابىلداپ، وزىق دامىعان وتىز ەلدىڭ قاتارىنا قوسىلۋدى مەجەلەدىك. ءار باعىت بويىنشا «ۇدەمەلى يندۋستريالىق- يننوۆاتسيالىق دامۋ»، «نۇرلى جول»، «100 ناقتى قادام» سياقتى اۋقىمدى باعدارلامالار جۇزەگە اسىرىلدى.
ساياسي جانە ەكونوميكالىق رەفورمالارمەن قاتار رۋحاني جاڭعىرۋعا باسا ءمان بەردىك. وسىناۋ تولاعاي تابىستاردىڭ بارىنە ەلباسىنىڭ دارا كوشباسشىلىعىنىڭ ءھام حالقىمىزدىڭ دانالىعى مەن پاراساتىنىڭ، بىرلىگى مەن ىنتىماعىنىڭ، وتانداستارىمىزدىڭ قاجىرلى ەڭبەگىنىڭ ارقاسىندا قول جەتكىزدىك. سوندىقتان، ەلباسى تاۋەلسىزدىگىمىزدىڭ ماڭگى سيمۆولىنا اينالدى دەسەك، اقيقاتتى ايتقان بولار ەدىك»، - دەدى پرەزيدەنت. قاسىم- جومارت توقايەۆ كەلەسى ونجىلدىقتىڭ مىندەتىن اتاپ ءوتتى.
«الداعى ءتورتىنشى ونجىلدىقتىڭ بىزگە جۇكتەيتىن مىندەتى - قۋاتتى ەلدىڭ يەسى جانە كەمەل حالىق بولۋ. بۇل جولدا ساياسي- ەكونوميكالىق رەفورمالاردى جانە سانانى جاڭعىرتۋ ۇدەرىسىن جالعاستىرىپ، زامان تالابىنا بەيىمدەلگەن ۇلتتىڭ جاڭا بولمىسىن قالىپتاستىرۋىمىز قاجەت. ءبىز ادىلەتتى قوعام مەن ءتيىمدى مەملەكەت قۇرۋدى كوزدەپ وتىرمىز. كەز- كەلگەن ىستە ادىلدىك قاعيداتىن باسشىلىققا الساق، بۇعان انىق قول جەتكىزەمىز. مىسالى، تۇرعىنداردىڭ تۇرمىسىن جاقسارتا تۇسپەسەك، ەلىمىزدىڭ جەتىستىكتەرى مەن حالىقارالىق تابىستارىن ماقتان ەتۋ ارتىق. ازاماتتارىمىز ەكونوميكالىق ءوسىمنىڭ يگىلىگىن سەزىنە الماسا، ودان ەش قايىر جوق. مەن ءاربىر شەشىمدى قابىلدار ساتتە وسى ۇستانىمدى باسشىلىققا الامىن. ءبىز حالىقتىڭ الەۋمەتتىك جاعدايىن جاقسارتۋمەن قاتار، بارلىق ازاماتتاردىڭ مۇددەسىن بىردەي قورعايمىز. مەنىڭ ۇعىمىمداعى ادىلەتتى مەملەكەت دەگەنىمىز - وسى. تاريحقا كوز جۇگىرتسەك، ءار بۋىن بەلگىلى ءبىر سىناقتى باسىنان وتكەرەدى. ءبىزدىڭ بابالارىمىز «اقتابان شۇبىرىندى، القاكول سۇلامانى»، اتالارىمىز الاپات اشارشىلىقتى، قۋعىن-سۇرگىندى، دۇنيەجۇزىلىك سوعىستى كوردى.
توتاليتارلىق كەزەڭدە ۇلتتىق قۇندىلىقتارىمىزدان، تىلىمىزدەن، ءدىلىمىز بەن دىنىمىزدەن ايىرىلىپ قالا جازدادىق. ونىڭ ءبارى تاۋەلسىزدىكتىڭ ارقاسىندا حالقىمىزعا قايتا ورالدى. ءبىراق، ۇلت پەن ەل رەتىندە ساقتالىپ قالۋ ءۇشىن بۇگىنگى جانە بولاشاق ۇرپاق جاڭا سىن- قاتەرلەرگە دايىن بولۋى كەرەك»، - دەدى پرەزيدەنت.
ونىڭ ايتۋىنشا، قازىرگى پاندەميا جانە سونىڭ سالدارىنان تۋىنداعان داعدارىس بۇكىل الەمنىڭ بۇرىن بولماعان جاڭا سىناقتارمەن بەتپە- بەت كەلىپ وتىرعانىن انىق كورسەتكەن.
«ەكونوميكالىق، الەۋمەتتىك، ەكولوگيالىق، بيولوگيالىق جانە باسقا دا قاتەرلەرگە قوسا، جەر جۇزىنە جاعىمسىز يدەولوگيالىق ۆيرۋستار دا جايىلىپ كەلەدى. جاھاندانۋ كەزىندە ەل جات جۇرتتىڭ ىقپالىنا بەيسانالى تۇردە ىلەسىپ كەتكەنىن اڭعارمايدى. باسقاشا ايتقاندا، ماجبۇرلىكتەن ەمەس، ساناسىنىڭ ۋلانۋى ارقىلى ءوز ەركىمەن تورعا تۇسەدى. سوندىقتان، جاڭا زاماننىڭ جاقسى- جامانىن ەكشەپ، ارتىقشىلىقتارىن بويعا سىڭىرۋمەن قاتار، تامىرىمىزدى بەرىك ساقتاۋىمىز قاجەت. ۇلتتىق بولمىسىمىزدان، ءتول مادەنيەتىمىز بەن سالت- داستۇرىمىزدەن اجىراپ قالماۋ - بارلىق وركەنيەتتەر ميداي ارالاسقان الاساپىراندا جۇتىلىپ كەتپەۋدىڭ بىردەن ءبىر كەپىلى»، - دەدى مەملەكەت باسشىسى.
