اقتوبە وبلىسىندا شامامەن ءبىر جارىم عاسىر بۇرىن جارىق كورگەن كىتاپ تابىلدى
تاريحي جادىگەردى حرومتاۋ اۋدانى تاسوتكەل اۋىلىنىڭ تۇرعىنى تاۋىپ العان، - دەپ حابارلايدى «حابار 24».
ەلدى مەكەن ماڭىنداعى قورىمنان شىققان كىتاپ پاراقتارى كونە اراب تىلىندە جازىلعان. تەلەارنا ءتىلشىسىنىڭ حابارىنا قاراعاندا، قاعاز بەتتەرى ابدەن سارعايعانىمەن، توتە جازۋ انىق كورىنەدى. جادىگەر يەسى كەڭەستىك كەزەڭدەگى ساياسي قۋعىن- سۇرگىننەن بوي تاسالاۋ ءۇشىن كىتاپتى ءقابىر باسىنا جاسىرعان بولۋى مۇمكىن دەگەن جورامال بار.
وبلىستىق مەشىت يمامدارى ءبىر بۋما قاعازداردى ءتورت ءتۇرلى كىتاپ دەپ وتىر. ءبىرى يسلام شاريعاتى تۋرالى جيناق بولسا، ەكىنشىسى اراب ءتىلىنىڭ ءالىپبيى بولۋى مۇمكىن. قالعاندارىنىڭ ءمان-ماعىناسى مەن باسپادان شىققان ۋاقىتى بىلىكتى ماماندار زەرتتەگەننەن كەيىن بەلگىلى بولادى. ءتيىستى زەردەلەۋ جۇمىستارى اياقتالعان سوڭ قۇندى جادىگەر وبلىستىق مۋزەيدىڭ «رۋحانيات» كورمە- زالىنا قويىلادى.
«حرومتاۋ اۋدانىنىڭ «نۇر« مەشىتىنىڭ باس يمامى وسى كىتاپتى قاراعاندا «بۇل قۇراننىڭ ءوزى ەمەس، ءبىراق ارابشا جازىلعان شاريعاتتىڭ زاڭىمەن ءومىر ءسۇرۋدىڭ سالتىن تۇسىندىرەتىن فيتح كىتابى« دەدى. بۇل ءبىر ەمەس ءتورت كىتاپ بولىپ شىقتى. وسىنىڭ ىشىندە بىرەۋى گرامماتيكا دەپ ايتتى»، - دەدى قالا تۇرعىنى سەرىك ءابدىجامي.
