ۇكىمەت باسشىسى اكىمدىكتەرگە: جۇمىسكەرلەردىڭ جاپپاي جۇمىستان بوساتىلۋىنا جول بەرىلمەسىن
«بۇل ماسەلەلەردى ەرەكشە باقىلاۋدا ۇستاۋ كەرەك. وسىعان بايلانىستى مىناداي تاپسىرما بەرەمىن: بىرىنشىدەن، ەڭبەك مينيسترلىگى اكىمدىكتەرمەن جانە مەملەكەتتىك ورگاندارمەن بىرلەسىپ، اقپاراتتىق جۇيەلەردەگى دەرەكتەردىڭ نەگىزىندە پرواكتيۆتى رەجيمدە جالاقى بويىنشا بەرەشەكتى انىقتاۋ الگوريتمىن ازىرلەسىن. ەكىنشىدەن، ەڭبەك قاتىناستارىن مونيتورينگتەۋ ءۇشىن ەڭبەك شارتتارىن تولىعىمەن ەلەكتروندى فورماتقا اۋىستىرۋدى قامتاماسىز ەتۋ كەرەك. بۇل ازاماتتاردىڭ ەڭبەك قۇقىقتارىنىڭ ساقتالۋىن جەدەل جانە وبەكتيۆتى باقىلاۋدى قامتاماسىز ەتۋگە مۇمكىندىك بەرەدى»، - دەدى اسقار مامين ۇكىمەت وتىرىسىندا.
ونىڭ ايتۋىنشا، ۇشىنشىدەن، 2021-جىلدىڭ ءبىرىنشى جارتىجىلدىعىنىڭ سوڭىنا دەيىن ەڭبەك مينيسترلىگى جۇمىس بەرۋشىلەر جانە كاسىپوداقتارمەن بىرلەسىپ، ەڭبەك قاۋىپسىزدىگى جانە ەڭبەكتى قورعاۋ جونىندەگى 2030-جىلعا دەيىنگى تۇجىرىمدامانى ازىرلەۋى ءتيىس.
«تورتىنشىدەن، اكىمدىكتەر مۇددەلى مەملەكەتتىك ورگاندارمەن بىرلەسىپ، جۇمىس بەرۋشىلەردىڭ قول قويىلعان مەموراندۋمدار شەڭبەرىندە جۇمىس ورىندارىن ساقتاۋ جونىندەگى مىندەتتەمەلەرىن ورىنداۋىن قامتاماسىز ەتسىن. جۇمىسكەرلەردىڭ جاپپاي جۇمىستان بوساتىلۋىنا جول بەرىلمەسىن، جۇمىسپەن قامتۋعا جاردەمدەسۋ شارالارىن قابىلداسىن. بەسىنشىدەن، قارجى مينيسترلىگى وڭالتۋداعى كاسىپورىنداردا جالاقى بويىنشا بەرەشەكتى تولەۋ، سونداي-اق مىندەتتى زەينەتاقى جارنالارى مەن الەۋمەتتىك اۋدارىمدار بويىنشا بەرەشەكتى ازايتۋ جونىندە پارمەندى شارالار قابىلداسىن»، - دەگەن اسقار مامين بۇل تاپسىرمانىڭ ورىندالۋىن ورىنباسارى ەرالى توعجانوۆقا تاپسىردى.
