ەلوردادا وقۋشىلارعا ارنالعان جاڭا جىلدىق شارالار ونلاين وتەدى
بۇل تۋرالى نۇر-سۇلتان قالالىق ءبىلىم باسقارماسىنىڭ باسشىسى شولپان قادىروۆا ايتىپ بەردى، دەپ حابارلايدى قازاقپارات ءتىلشىسى.
«قازىرگى تاڭدا اتا- انالاردى ءبىلىم بەرۋ ۇيىمدارىندا جاڭا جىلعا ارنالعان مەرەكەلىك شارالاردىڭ قالاي وتەتىتىنى تۋرالى سۇراق مازالايتىنىن بىلەمىن. جاڭا جىل - بۇل جاي عانا مەرەكە ەمەس، ءار بالا ءۇشىن عاجايىپتىڭ بەلگىسى ىسپەتتەس. جاڭا جىل قارساڭىندا ءبىلىم بەرۋ ۇيىمدارىندا بۇرىن شىرشالار بەزەندىرىلىپ، ادەمى كيىمدەرسىز جانە ءتاتتى سىيلىقتارسىز وتكىزىلمەيتىن. الايدا كارانتيندىك شەكتەۋ شارالارىنا بايلانىستى ءبىلىم بەرۋ ۇيىمدارىندا جوعارىدا اتالعان ءىس- شارالاردى وتكىزۋگە جول بەرىلمەيدى»، - دەدى شولپان قادىروۆا ەلوردا اكىمدىگىندە وتكەن باسپا ءسوز ءماسليحاتىندا.
ونىڭ ايتۋىنشا بۇگىنگى كۇنى مەكتەپكە دەيىنگى ۇيىمداردا ءاربىر توپتا بارلىق سانيتارلىق تالاپتى ساقتاي وتىرىپ، اتا- انالاردىڭ قاتىسۋىنسىز «قوش كەلدىڭ، جاڭا جىل» تاقىرىبىندا مەرەكەلىك ساباقتار وتكىزىلۋدە. جاڭا جىلدىق ساباقتاردى وتكىزۋ ءۇشىن توپتار تاقىرىپقا سايكەس بەزەندىرىلگەن. ءار توپقا شىرشا ورناتىلعان. ساباق ستسەنارييىنە سايكەس ءار بالا مەرەكەلىك كيىممەن قاتىسادى. سونىمەن قاتار، قازاقستان رەسپۋبليكاسى پرەزيدەنتىنىڭ جانە نۇر-سۇلتان قالاسى اكىمىنىڭ اتىنان مەكتەپ وقۋشىلارىنا جاڭا جىلدىق سىيلىقتاردى تابىستاۋ بويىنشا جۇمىستار ۇيىمداستىرىلۋدا.
«ق ر پرەزيدەنتىنىڭ اتىنان جاڭا جىلدىق سىيلىق جيىنتىعى اتا- اناسىنىڭ قامقورلىعىنسىز قالعان جەتىم بالالار مەن ەرەكشە ءبىلىم بەرۋ قاجەتتىلىكتەرى بار 200 بالاعا بەرىلەدى. كەشە، ياعني 24-جەلتوقساندا بالالارعا جاڭا جىلدىق سىيلىقتار، ياعني - پرەزيدەنتتىڭ قۇتتىقتاۋ حاتى، كىتاپ جانە «ورچەسترا» دۇكەندەرىنەن كيىم ساتىپ الۋعا 100 مىڭ تەڭگەگە سەرتيفيكات، تاتتىلەر مەن ۇستەل ويىنى تابىستالدى. ال 25-جەلتوقسان كۇنى نۇر-سۇلتان قالاسى اكىمىنىڭ اتىنان جاڭا جىلدىق سىيلىق جيىنتىقتارى از قامتىلعان، كوپ بالالى جانە تولىق ەمەس وتباسىلاردان شىققان بالالارعا، جانە ءار ءتۇرلى جەتىستىكتەرگە جەتكەن دارىندى 450 بالاعا تابىستالادى. بالالارعا جاڭا جىلدىق سىيلىقتاردى اياز اتا مەن اقشاقار سانيتارلىق نورمالاردى ساقتاي وتىرىپ، بالانىڭ ۇيىنە بارىپ سالتاناتتى تۇردە تابىستايدى. جاڭا جىلدىق ءىس- شارالار بارلىق ءبىلىم بەرۋ ۇيىمدارىندا بەكىتىلگەن جوسپارعا سايكەس ونلاين فورماتتا وتەدى»، - دەدى ول.
اۆتور: ايان بەكەن ۇلى
