زەينەتاقى جۇيەسىن قانداي وزگەرىستەر كۇتىپ تۇر
ايتا كەتسەك بۇعان دەيىن سەناتورلار ۇكىمەت باسشىسىنا دەپۋتاتتىق ساۋال جولداپ، 2030 -جىلعا دەيىن زەينەتاقى جۇيەسىن جاڭعىرتۋ تۇجىرىمداسىنىڭ جوباسىن سىنعا العان ەدى. ولاردىڭ ايتۋىنشا اتى دارداي بولسا دا، بۇل تۇجىرىمدامادا ەشقانداي جاڭالىق جوق. ەسەسىنە، بۇعان دەيىن بەرىلىپ كەلگەن بازالىق زەينەتاقى تولەمىن، ەڭ تومەنگى زەينەتاقى مەن جيناقتالعان زەينەتاقىنىڭ ساقتالۋىن قامتاماسىز ەتەتىن مەملەكەتتىك كەپىلدەمەنى بىرىكتىرىپ، ءبىر عانا كەپىلدەندىرىلگەن تومەنگى زەينەتاقى دەگەن ۇعىم ەنگىزىلگەلى وتىر.
بۇل جەردە دە اۋىلداعى زەينەتكەرلەر سول ەڭ تومەنگى زەينەتاقىعا تاۋەلدى بولايىن دەپ تۇر. بۇل ساۋالعا جاۋاپ بەرگەن ۇكىمەت باسشىسى بۇگىنگى تاڭدا جيناقتاۋشى زەينەتاقى جۇيەسىنە قاتىسۋشىلاردىڭ سانى 11,2 ميلليون ادام ەكەنىن، ونىڭ ىشىندە اۋىل ازاماتتارى 4,7 ميلليون ادام ەكەنىن حابارلايدى. ءبىرىڭعاي جيناقتاۋشى زەينەتاقى قورىنداعى زەينەتاقى جيناقتارىنىڭ سوماسى 12,2 تريلليون تەڭگەگە جەتكەن. ونىڭ 3,6 تريلليون تەڭگەسى اۋىلداعى حالىققا تيەسىلى. زەينەتاقى تولەمىنىڭ ورتاشا مولشەرى رەسپۋبليكا بويىنشا 121282 تەڭگەنى (بازالىق - 29520 تەڭگە، ىنتىماقتى - 64538 تەڭگە، جيناقتاۋشى - 27224 تەڭگە)، ال اۋىل تۇرعىندارىنىڭ زەينەتاقى تولەمدەرىنىڭ ورتاشا مولشەرى 108858 تەڭگەنى قۇرايدى.
«زاڭعا سايكەس ازاماتتارعا زەينەتاقى تولەمىن تاعايىنداۋ كەزىندە ەڭبەك ءوتىلى، ەڭبەك كىتاپشاسىنداعى، اقپاراتتىق جۇيەدەگى مالىمەتتەر نەمەسە ارحيۆ دەرەكتەرى نەگىزىندە ەسەپكە الىنادى. مۇنداي مالىمەتتەر بولماعان جاعدايدا ەڭبەك ءوتىلىن سوت شەشىمى نەگىزىندە راستاۋعا مۇمكىندىك بار. قازىرگى تاڭدا زەينەتاقى جۇيەسىن جاڭعىرتۋدىڭ 2030 -جىلعا دەيىنگى تۇجىرىمداماسىنىڭ ەكىنشى كەزەڭى ىسكە اسىرىلۋدا. ونىڭ اياسىندا بازالىق زەينەتاقىنى 2030 -جىلدان باستاپ ەڭ تومەنگى كەپىلدىك بەرىلگەن زەينەتاقىعا اينالدىرۋ قاراستىرىلعان»، - دەيدى اسقار مامين.
پرەمەر- مينيستر اتاپ ايتقاندا، بازالىق زەينەتاقىنىڭ ەڭ تومەنگى مولشەرىن ەڭ تومەنگى كۇنكورىس دەڭگەيى كولەمىنىڭ 54 پايىزىنان 70 پايىزىنا دەيىن ارتتىرۋ، زەينەتاقى جۇيەسىنە قاتىسۋ ءوتىلىنىڭ 5 جىلدان كەيىنگى ءاربىر جىلى ءۇشىن تولەم مولشەرىن 2 پايىزعا ۇلعايتۋ (بۇل قازىرگى كەزدەگىدەن 10 پايىزعا ارتىق)، سونداي- اق مولشەردىڭ ەڭ جوعارى شەكتەۋىن الىپ تاستاۋ كوزدەلىپ وتىرعانىن ايتادى. «بۇل شارالار زەينەتاقىمەن قامسىزداندىرۋ، ونىڭ ىشىندە تابىسى تومەن ازاماتتاردىڭ ءومىر ءسۇرۋ دەڭگەيىن كوتەرۋگە مۇمكىندىك بەرەدى»، - دەپ سەندىرەدى اسقار مامين.
اۆتور: ايان بەكەن ۇلى
