قازاقستاندىق اسكەريلەر قاي ەلدەردە بىتىمگەرشىلىك ميسسيادا ءجۇر

«2007 -جىلدان باستاپ ءارتۇرلى بىتىمگەرلەر باقىلاۋشى رەتىندە ءتۇرلى ميسسيالارعا، ونىڭ ىشىندە باتىس ساحارا، كوت- ديۆۋار، ليۆانعا جىبەرىلدى. ودان بولەك، ارنايى جاساق يراكتا تاپسىرما ورىندادى. قازىر ليۆاندا ءتورتىنشى روتا ءجۇر. تاعى ءتورت اسكەري قىزمەتشىمىز باتىس ساحارادا. سونىمەن قاتار، ءبىز قازىر ارنايى مامانداندىرىلعان بولىمشەلەردى دايىنداپ جاتىرمىز. مۇندا ب ۇ ۇ سۇرانىسقا يە دەپ اتاعان ينجەنەرلىك- ساپەرلىك بولىمشە، اسكەري پوليتسيا، بارلاۋ بولىمشەسى جانە اسكەري- مەديتسينالىق بولىمشە بار»، - دەدى نۇرلان ەرمەكبايەۆ ورتالىق كوممۋنيكاتسيالار قىزمەتىندە وتكەن بريفينگتە.

ءمينيستردىڭ ايتۋىنشا، قازاقستاندىق اسكەري قىزمەتشىلەردى بىتىمگەرشىلىك ميسسيا اياسىندا جىبەرۋ ءۇشىن دالالىق اسكەري- مەديتسينالىق گوسپيتال ازىرلەنىپ جاتىر.

«قايدا جىبەرەتىنىمىزدى ب ۇ ۇ شەشەدى. شامامەن افريكا ەلىنە جىبەرۋى مۇمكىن. (...) بەيرۋت پورتىندا (ليۆان) بولعان جارىلىستان زارداپ شەككەندەرگە مەديتسينالىق كومەك كورسەتۋ ءۇشىن پرەزيدەنتتىڭ تاپسىرماسىمەن ەكى تاۋلىكتە ليۆانعا 32 اسكەري مەديتسينا ماماندارى جاساعى جىبەرىلدى، ولار ەكى اپتا بويى جەرگىلىكتى حالىققا كومەك كورسەتتى»، - دەدى ن. ەرمەكبايەۆ.

ەسكە سالا كەتسەك، 4 - تامىزدا ليۆان استاناسى بەيرۋت قالاسىنداعى پورتتا جويقىن جارىلىس بولدى. ق ر پرەزيدەنتى قاسىم- جومارت توقايەۆ ليۆان پرەزيدەنتى ميشەل اۋنمەن تەلەفون ارقىلى سويلەسىپ، ليۆانداعى قازاقستاندىقتاردىڭ قاۋىپسىزدىگىن قامتاماسىز ەتۋ جونىندە ءوتىنىش بىلدىرگەن ەدى.

اۆتور: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى