ەرلان داۋىلبايەۆ سايلاۋدى بايقاۋ نەگىزدەرىن ءتۇسىندىردى
وتىرىسقا ونلاين رەجيمدە 500 دەن استام قاتىسۋدا. ورتالىق سايلاۋ كوميسسياسىنىڭ مۇشەسى ەرلان داۋىلبايەۆ سايلاۋدى بايقاۋ نەگىزدەرىن ءتۇسىندىردى.
«داۋىس بەرۋگە ارنالعان نىساندا سايلاۋ ۋچاسكەسى اشىلعان ساتتەن باستاپ داۋىس بەرۋ قورىتىندىسى شىققانعا دەيىن داۋىس ساناۋ بارىسىنا مىنا ازاماتتار قاتىسۋعا قۇقىلى: حالىقارالىق بايقاۋشىلار (ولار اۋدارماشىمەن ءجۇرۋى مۇمكىن)، شەتەلدىك بۇقارالىق اقپارات قۇرالدارىنىڭ وكىلدەرى (ولاردىڭ سانى شەكتەلمەيدى). وتاندىق بايقاۋشىلار تۋرالى ايتار بولساق، ءاربىر ساياسي پارتيادان، باسقا دا قوعامدىق ۇيىمداردان نەمەسە كوممەرتسيالىق ەمەس ۇيىمداردان ءبىر ۋاقىتتا ءبىر- ءبىر بايقاۋشىدان قاتىسا الادى»، - دەدى ەرلان داۋىلبايەۆ.
ونىڭ ايتۋىنشا بۇل تالاپ ساياسي پارتيالاردىڭ سەنىمدى وكىلدەرىنە دە جانە قازاقستاندىق باق وكىلدەرىنە دە قاتىستى ەكەنىن جەتكىزدى.
«داۋىس بەرۋگە ارنالعان نىسانداعى ادامدار سايلاۋ كوميسسياسى بەكىتكەن ەرەجەلەردى قاتاڭ ساقتاۋى كەرەك. ول ەرەجەلەردە بايقاۋشىلار مەن داۋىس بەرۋشىلەردىڭ قۇقىقتارى مەن مىندەتتەمەلەرى ناقتى بەكىتىلگەن. داۋىس بەرۋ كۇنى ۋچاسكەلىك سايلاۋ كوميسسياسىنىڭ ءتوراعاسى كوميسسيانىڭ اشىقتىعىن قامتاماسىز ەتىپ، سايلاۋشىلاردىڭ بەلسەندى سايلاۋ قۇقىعىن ءتۇسىندىرۋى كەرەك. ول سايلاۋ ۋچاسكەسىندەگى سايلاۋشىلاردىڭ سانىن قاداعالاپ، ءتارتىپ ءۇشىن جاۋاپتى بولادى، كونستيتۋتسيالىق زاڭداعى ءتارتىپتى بۇزىپ، داۋىس بەرۋگە كەدەرگى كەلتىرگەن كەز كەلگەن ادامدى نىساننان شىعارۋعا قۇقىلى»، - دەدى ول.
اۆتور: ايان بەكەن ۇلى
